საავტომობილო გზების დეპარტამენტმა 21 აგვისტოს ფშაველი-აბანო-ომალოს გზის რეაბილიტაციის მიზნით ტენდერი გამოაცხადა. სარეაბილიტაციო სამუშაოები საავტომობილო გზის კმ21.5-კმ25.5 მონაკვეთზეა ჩასატარებელი.
შესასრულებელი სამუშაოების ჩამონათვალში შედის: მოსამზადებელი სამუშაოები; ბაზის მოწყობა სამშენებლო მოედანზე; მიწის ვაკისის მოწყობა; რკინაბეტონის ღარის მოწყობა; რკინაბეტონის საყრდენი კედლების მოწყობა; არსებული სახიდე გადასასვლელების შეკეთება; გაბიონის საყრდენი კედლების მოწყობა; გზის კუთვნილება და მოწყობილობა.
შესყიდვის სავარაუდო ღირებულება 17 940 426 ლარია.
შეთავაზების ფასის კლების ბიჯი და გარანტიის ოდენობა 179 404 ლარია.
წინადადებების მიღება 20 სექტემბერს დაიწყება და 25 ოქტომბერს დასრულდება.
შეგახსენებთ, ფშაველი-აბანო-ომალოს 72 კმ-იანი გზის საგზაო მოძრაობის უსაფრთხოების გაუმჯობესების პროექტი ითვალისწინებს საავტომობილო გზის პროფილის აღდგენას, წყალგამტარი, წყალამრიდი და ხელოვნური ნაგებობების მოწყობას, მოძრაობის რეგულირების ტექნიკური საშუალებების სრულყოფილ აღდგენას, მიწის ვაკისის, შესაძლებლობის ფარგლებში, გაგანიერებას და მოძრაობის უსაფრთხოების უზრუნველსაყოფად, ბოგიროვანი ზღუდარების მოწყობას.
თუშეთის გზის პროექტი 8 მონაკვეთადაა დაყოფილი. უკვე გაფორმებულია 6 ხელშეკრულება, რაც გზის 50 კმ-მდე მონაკვეთის საგზაო მოძრაობის პირობების გაუმჯობესების სამუშაოებს მოიცავს და მისი ღირებულება, ჯამში, 51.6 მილიონი ლარია. დარჩენილ ორ, ჯამში, 15 კმ-იან მონაკვეთზე, სამუშაოები ეტაპობრივად დაიწყება.
ფშაველი-აბანო-ომალოს საავტომობილო გზის პირველი 22.5 კმ. იქნება ასფალტის საფარში მოქცეული. დანარჩენი მონაკვეთების საფარი, რელიეფიდან გამომდინარე, გრუნტიანი დარჩება, აღდგება გზის დაზიანებული ადგილები და გაუმჯობესდება არსებული პარამეტრები.
ამ ეტაპზე, პირველ მონაკვეთზე მიმდინარეობს რკინაბეტონის წყალგამტარი მილების, მიწის ვაკისის, რკინაბეტონის და გაბიონის საყრდენი კედლების, ნაპირდამცავი ბეტონის წყალმიმმართველი დეზების მოწყობის სამუშაოები.
თუშეთამდე მისასვლელი ერთადერთი გზა ფშაველი-ომალოს საავტომობილო გზაა, რომელიც თელავის მუნიციპალიტეტის სოფელ ფშაველიდან იწყება და აბანოს უღელტეხილის გავლით ომალოს უკავშირდება. თუშეთის გზა, გასული საუკუნის 60-70-იან წლებშია გაყვანილი. ეს გზა აბანოს უღელტეხილზე გადის, რომელიც ზღვის დონიდან 2950 მეტრზე მდებარეობს. რთული რელიეფისა და მეტეოროლოგიური პირობების გამო, გზაზე ტრანსპორტის მოძრაობა წელიწადში დაახლოებით 4-5 თვის განმავლობაშია შესაძლებელი. ფშაველი-აბანო-ომალოს გზის საგზაო მოძრაობის უსაფრთხოების გაუმჯობესების პროექტი ეტაპობრივად, 2025 წელს დასრულდება.
წყარო: "ბიზნესპრესნიუსი"
