მსურს გამოვიყენო ეს შესაძლებლობა და საქართველოს მივულოცო კაპიტალის საერთაშორისო ბაზარზე წარმატებული დაბრუნება. JP Morgan, ისევე როგორც ჩვენი პარტნიორი ბანკები ვამაყობთ, რომ ვმონაწილეობდით ამ პროცესში და ვთანამშრომლობთ საქართველოსთან, - აღნიშნა კომპანია JP Morgan-ის მმართველმა დირექტორმა სტეფან უაილერმა საქართველოს მთავრობის მიერ 500 მილიონი აშშ დოლარის ოდენობის ევროობლიგაციების რეფინანსირების შეფასებისას.
მისი თქმით, გამოშვებისას მოთხოვნა მნიშვნელოვნად აღემატებოდა მიწოდებას. ჩვენ ვიხილეთ 5.5-ჯერ მეტი მოთხოვნა 100-ზე მეტი ინვესტორისგან მთელი მსოფლიოს მასშტაბით. განსაკუთრებით აქტიურობდნენ აშშ, დიდი ბრიტანეთი და მსოფლიოს სხვა ქვეყნები.
„დაფიქსირებული საპროცენტო განაკვეთი ყველაზე დაბალია არასაინვესტიციო რეიტინგის მქონე ქვეყნების მიერ დაფიქსირებულ საპროცენტო განაკვეთებს შორის, 2022 წლის შემდეგ. ეს ძალიან მნიშვნელოვანი ბენჩმარკია საქართველოსთვის. გულწრფელად ვულოცავ საქართველოს და ფინანსთა სამინისტროს გუნდს. უდიდესი სამუშაო ჩატარდა და მაღალი საბაზრო მერყეობის პირობებში, რთული და სწორი გადაწყვეტილებების შედეგად მიღწეულ იქნა ეს დიდებული შედეგი“, - აღნიშნა კომპანია JP Morgan-ის მმართველმა დირექტორმა სტეფან უაილერმა.
ინფორმაციას ფინანსთა სამინისტრო ავრცელებს.
