რუსეთში გადასახადები კიდევ იზრდება.
- რუსეთში დამატებული ღირებულების გადასახადი (დღგ) 2025 წლის 1 იანვრიდან 20%-დან 22%-მდე გაიზრდება, რაც მცირე ბიზნესსა და მომხმარებლებს დამატებით ფინანსურ ტვირთს დააკისრებს.
- გადასახადების ზრდის მიზანია ბიუჯეტის დეფიციტის შემცირება და სამხედრო ხარჯების დაფარვა, მაგრამ ექსპერტები პროგნოზირებენ ფასების ზრდას, ინფლაციის აჩქარებას და ეკონომიკური ვარდნის რისკს.
- საქართველოს ეკონომიკა, რომელიც მნიშვნელოვნადაა დამოკიდებული რუსეთის ბაზარზე, შესაძლოა დაზარალდეს რუსეთის ეკონომიკის მოსალოდნელი შემცირების შედეგად.
რა ელის პუტინის ომის ეკონომიკას 2026 წელს?
რუსეთის ბიუჯეტის დაბალანსების მნიშვნელოვანი წყაროა ეროვნული კეთილდღეობის ფონდი, თუმცა რუსეთის ცენტრალური ბანკის მონაცემებით, ომის გამო ფონდში ნაღდი ფულის ოდენობა თითქმის განახევრდა 2022 წლის შემდეგ, რადგან ამ ფონდის თანხები აქტიურად გამოიყენება სწორედ ბიუჯეტის დეფიციტის დასაფარად: 2022 წლის დეკემბერში, უკრაინაში შეჭრის პირველი წლის შემდეგ, რუსეთის ეროვნული კეთილდღეობის ფონდიდან 2,41 ტრილიონი რუბლი დაიხარჯა. 2023 წელს რუსეთის ბიუჯეტის დეფიციტის დასაფარად ფონდიდან გამოიყო - 2,9 ტრილიონი რუბლი, 2024 წელს კი - 2,12 ტრილიონი რუბლი. ეკონომისტების განმარტებით, თუ ნავთობის ფასები დაეცემა, 2025 წელს ეროვნული კეთილდღეობის ფონდს ფული შეიძლება საერთოდ გამოელიოს. Bloomberg-ის გათვლებით, ნავთობის გაყიდვიდან რუსეთის ყოველთვიური ბიუჯეტის შემოსავალი ორწლიან მინიმუმამდე დაეცა.
რუსეთის ეკონომიკა რეცესიის მოლოდინში
როგორც ეკონომისტები ფიქრობენ, გადასახადების გაზრდით რუსეთის მთავრობა მოკლე ვადიან პერსპექტივაში გარკვეულ სარგებელს მიიღებს, თუმცა საშუალო და გრძელვადიან პერსპექტივაში, გადასახადების გაზრდა გარდაუვალად გამოიწვევს რუსეთის ეკონომიკის ვარდნასა და შესაძლოა კოლაფსსაც კი.
შესაძლო გავლენა საქართველოზე
საქართველოს ეკონომიკა მნიშვნელოვნადაა დამოკიდებული რუსეთის ეკონომიკაზე, რაც, ექსპერტების აზრით, მნიშვნელოვან რისკებს შეიცავს, რადგან რუსეთის ეკონომიკის მოსალოდნელი შემცირება და კოლაფსი, სავარაუდოდ, საქართველოზეც იქონიებს გავლენას. საქსტატის 2024 წლის მონაცემებით, რუსეთი საქართველოს მეორე უმსხვილესი სავაჭრო პარტნიორია. რუსეთთან სავაჭრო ბრუნვის ძირითად ნაწილს იმპორტი შეადგენს. საქართველო რუსეთისგან 2,7-ჯერ მეტი ღირებულების საქონელს ყიდულობს, ვიდრე თავად ჰყიდის რუსეთში. რუსეთი საქართველოს მეოთხე (10,4%) უმსხვილესი საექსპორტო პარტნიორია (ძირითადი საექსპორტო საქონელი ღვინო და სხვა სახის სასმელებია).
საერთაშორისო გამჭვირვალობა - საქართველოს მონაცემებით, რუსეთზე მაღალი დამოკიდებულებით გამოირჩევა ტურიზმის დარგი. რუსეთი ლიდერობს ვიზიტორების რაოდენობაშიც.
რუსი ვიზიტორებისგან მიღებული შემოსავალი: 2024 წელი - 850,1 მლნ $; 2023 წელი - 938,4 მლნ $; 2022 წელი - 891 მლნ $; 2021 წელი - 151,7 $.
მაღალია საქართველოს დამოკიდებულება რუსეთის ენერგორესურსებზეც: 2023 წელს საქართველოში რუსეთიდან 787 მლნ კვტ.სთ ელექტროენერგია შემოიტანა, 2024 წელს - 1,2 მლრდ კვტს.სთ-ზე მეტი.
მზარდია რუსული გაზის იმპორტიც: 2024 წელი - 145,7 მლნ $; 2023 წელი - 110,2 მლნ $; 2022 წელი - 93,1 მლნ $; 2021 წელი - 70,8 მლნ $.
