"სიმართლეს არ შეესაბამება. მეც მედიით გავიგე“ - ასე გამოეხმაურა „დინამო თბილისის“ გენერალური დირექტორი ზაზა დოლიძე კლუბის გაყიდვის შესახებ გავრცელებულ ინფორმაციას. როგორც მან Bm.ge-სთან ინტერვიუში აღნიშნა, მსგავსი სახის არასწორი ინფორმაციის გავრცელება ხელს უშლის იმ ბიზნესპროცესების წარმოებას, რომლითაც კლუბის ხელმძღვანელობა დამატებითი რესურსების მოძიებას ცდილობს.
„ჩვენ ვეძებთ პარტნიორს და დღესაც ვმუშაობთ რამდენიმე საკითხზე პოტენციურ პარტნიორებთან, როგორც პრეზიდენტი, ასევე, მე, როგორც გენერალური დირექტორი, ჯერჯერობით, კონკრეტული არაფერი გვაქვს. ახლაც საუდის არაბეთში ვარ და დიდ პროექტს ვაკეთებთ, რასაც მალე გაიგებს ჩვენი გულშემატკივარი. ვაგრძელებთ მუშაობას, არაფერი განსაკუთრებული არ მომხდარა, ერთ-ერთმ ჟურნალისტმა დაწერა თავისი მოსაზრება და რამდენიმე საიტმა უპასუხისმგებლოდ გაავრცელა. გადამოწმების გარეშე, შესაბამისად, გავრცელდა ტყუილი“, - განაცხადა ზაზა დოლიძემ.
მისივე თქმით, „დინამო თბილისის“ ხელმძღვანელობა პარტნიორების ძიებას რამდენიმე მიმართულებით აგრძელებს.
"ჩვენ პარტნიორებს ვეძებთ როგორც კლუბის პარტნიორის მოძებნის კუთხით, რათა კლუბში, რომელსაც რომან ფიფიას ოჯახი ფლობს, ასევე იყოს წილობრივად სხვა მფლობელიც. ასევე, ვეძებთ ბიზნეს პარტნიორებს, რომლებიც დააფინანსებენ სხვადასხვა ინფრასტრუქტურულ პროექტს, მაგალითად, საფეხბურთო მოედნების მოწყობას და იქ საფეხბურთო სკოლების განთავსებას. გარდა ამისა, ვეძებთ პარტნიორებს ჩვენი კლუბის სპონსორობისთვის.
ამაზე ყოველთვის მიდის მუშაობა, ფინანსური რესურსი რაც ჩვენ გაგვაჩნია, არ არის საკმარისი იმისთვის, რომ ამ ეტაპზე მაღალი მიზნებისთვის ვიბრძოლოთ, თუმცა ვაგრძელებთ მუშაობას.
ფეხბურთი არ არის პირდაპირ მოგებიანი სპორტი, ფეხბურთს სჭირდება დაფინანსება და რაღაც ვადის შემდეგ იგი ხდება მოგებიანი. ფეხბურთს ასევე სჭირდება გულშემატკივარი, გულშემატკივარმა უნდა შექმნას ის გარემო, სადაც ბიზნესი დაინტერესდება ფეხბურთით“, - განაცხადა „დინამო თბილისის“ გენერალურმა დირექტორმა bm.ge-სთან ინტერვიუში.
