ღვინის ეროვნული სააგენტოს მხარდაჭერითა და სააგენტოს კონტრაქტორი ამერიკული მარკეტინგული კომპანიის „Colangelo & Partners” ორგანიზებით, აშშ-ში, კოლუმბიის უნივერისტეტის ღვინის კლუბში, ქართული ღვინის დეგუსტაცია-პრეზენტაცია გაიმართა – ინფორმაციას სააგენტო ავრცელებს.
„ღონისძიებას, რომელზეც წარმოდგენილი იყო სხვადასხვა ღვინის კომპანიის ექვსი ღვინო საქართველოს მევენახეობის რეგიონებიდან, 70-მდე სტუდენტი დაესწრო. დეგუსტაციაზე დააგემოვნეს როგორც ქვევრის, ისე კლასიკური წესით დაყენებული ღვინოები; განსაკუთრებული მოწონება და ინტერესი წითელმა ღვინოებმა დაიმსახურა.
კოლუმბიის უნივერისტეტის ღვინის კლუბში 300-მდე წევრია. ქართული ღვინის წარდგენა ღვინის პროფესიონალებისა და დაინტერესებული დამსწრეების წინაში, ქმნის დამატებით შესაძლებლობას, რომ ამერიკის შეერთებული შტატების ბაზარზე ქართული ღვინის ცნობადობა გაიზარდოს და პოზიციები გამყარდეს.
აღსანიშნავია, რომ აშშ ქართული ღვინის ერთ-ერთ სტრატეგიულ საექსპორტო ბაზარს წარმოადგენს. ღვინის ეროვნული სააგენტოს მხარდაჭერით, 2013 წლიდან განხორციელებულმა მიზანმიმართულმა მარკეტინგულმა აქტივობებმა მნიშვნელოვნად შეუწყო ხელი აშშ-ში ქართული ღვინის ცნობადობის და ექსპორტის ზრდას. 2024 წელს ექსპორტმა ისტორიულ მაქსიმუმს - 1,2 მილიონ ლიტრს მიაღწია, რაც 2023 წლის მაჩვენებელს 32%-ით აღემატება“ – ნათქვამია ინფორმაციაში.
