ხორცპროდუქტებისა და ნახევარფაბრიკატების მწარმოებელი კომპანია „მითანა“ დაიკეტა. ნახევარფაბრიკატების ხაზი კი, რომელსაც კომპანია გასული წლის შემდეგ ავითარებდა, საკონდიტრო კომპანია "ტკბილი ქვეყნის" მართვის ქვეშ გადავიდა.
ხორცპროდუქტების მწარმოებელი კომპანია "მითანა" და საკონდიტრო საწარმო "ტკბილი ქვეყანა" ადგილობრივ ბაზარზე 2005-2006 წლებში შემოვიდა და წლების განმავლობაში დამოუკიდებელი მენეჯმენტის ქვეშ ვითარდებოდა. თუმცა უნდა აღინიშნოს, რომ ორივე კომპანიის 100%-იანი წილის მფლობელი ამირან ქორთიაშვილია, რომელიც ასევე წილებს კომპანია "გლობუსში" და "რჩეულში" მართავს. უნდა აღინიშნოს, რომ "მითანას" ხორცპროდუქტების, კონკრეტულად კი ძეხვეულობის წარმოების გაჩერების შესახებ BM.GE-სთან გასულ წელს კომპანიის წარმომადგენელმა ისაუბრა, მაშინ ბაზარზე არსებული მაღალი კონკურენცია და წარმოების ზარალიანობა დასახელდა. თუმცა "მითანა" ნახევარფაბრიკატების წარმოების განვითარებაზე აპირებდა გადაწყობას.
"მითანას" ბრენდიდან ნახევარფაბრიკატების წარმოების "ტკბილი ქვეყნის" ბრენდის ქვეშ გადასვლის შესახებ BM.GE-სთან "ტკბილი ქვეყნის" გაყიდვების დეპარტამენტის უფროსმა, ჯაბა მაისურაძემ ისაუბრა, თუმცა "მითანას" დახურვისა და მათი ხაზის "ტკბილი ქვეყნის" მართვის ქვეშ გადასვლის მიზეზები არ განუმარტავს. მისი ინფორმაციით, ამ დრომდე შიდა ტექნიკური საკითხების მოგვარების პროცესი მიმდინარეობს და ერთ კვირაში „ტკბილი ქვეყნის“ ბრენდის ქვეშ, ისეთი ნახევარფაბრიკატები, როგორიცაა ხინკალი, პელმენი და ა.შ. გაიყიდება.
ვრცლად bm.ge
