2024 წლის მაისის თვეში გარემოს ეროვნულმა სააგენტომ რეკომენდაცია გასცა საქართველოს სახელმწიფოს ენერგეტიკული პოლიტიკისა და მისი დანართის - ენერგეტიკისა და კლიმატის ეროვნული ინტეგრირებული გეგმის სტრატეგიულ გარემოსდაცვით ანგარიშსა და სტრატეგიული დოკუმენტის პროექტზე. ენერგეტიკისა და კლიმატის ეროვნული ინტეგრირებული გეგმაში განსაკუთრებული ყურადღება ეთმობა 2023 წლისთვის მისაღწევ მიზნებს, მათ შორის სათბური აირების ემისიის შემცირებას და განახლებადი წყაროებიდან ენერგიის გენერაციის ზრდას.
 
კლიმატის ცვლილება ჩვენი დროის ერთ-ერთ ყველაზე აქტუალურ გამოწვევად იქცა კაცობრიობისთვის და ეკოსისტემებისთვის მთელი მსოფლიოს მასშტაბით, ყოველდღიურად ვაწყდებით ამ ცვლილების შედეგებს: ტემპერატურის მატება, ექსტრემალური ამინდი (ქარიშხალი, გვალვა, წყალდიდობა), ზღვის დონის აწევა, დაბინძურებული ჰაერი და ა.შ. ეს ყველაფერი კი იწვევს რიგ ეკონომიკურ და სოციალურ პრობლემებს, კლიმატთან დაკავშირებულმა კატასტროფებმა შეიძლება დააზიანოს ინფრასტრუქტურა და დაარღვიოს მიწოდების ჯაჭვები, რამაც შეიძლება გამოიწვიოს სამუშაო ადგილების დაკარგვა, ეკონომიკური უთანასწორობის გაზრდა, მასობრივი მიგრაცია და პოლიტიკური არასტაბილურობა.
 
კლიმატის ცვლილების შემცირება მოითხოვს სასწრაფო და კოორდინირებულ მოქმედებას როგორც ადგილობრივ, ისე გლობალურ დონეზე სათბური აირების ემისიების შესამცირებლად.
 
ერთ-ერთ გადამწყვეტ როლს ამ პროცესში განახლებადი ენერგია ასრულებს.
წიაღისეული საწვავისგან განსხვავებით, განახლებადი ენერგიის წყაროები, როგორიცაა მზის, ქარი, ჰიდრო ენერგია, ელექტროენერგიას გამოიმუშავებს ატმოსფეროში ნახშირორჟანგისა და სხვა მავნე დამაბინძურებლების გამოყოფის გარეშე.  განახლებად ენერგიაზე გადასვლით, ჩვენ შეგვიძლია შევამსუბუქოთ კლიმატის ცვლილების შედეგები:
 
სათბურის გაზების ემისიების შემცირება - განახლებადი ენერგიის ტექნოლოგიები წარმოქმნის სათბურის გაზების მინიმალურ რაოდენობას ან საერთოდ არ გამოყოფს ელექტროენერგიის წარმოებისას, რაც ხელს უწყობს ატმოსფეროში ნახშირორჟანგის და სხვა დამაბინძურებლების დონის შემცირებას.
 
წიაღისეულ საწვავზე დამოკიდებულების შემცირება - განახლებადი ენერგიის წყაროების გამოყენებით, ჩვენ შეგვიძლია შევამციროთ ჩვენი დამოკიდებულება წიაღისეული საწვავის სასრულ რეზერვებზე და გავაძლიეროთ ენერგეტიკული უსაფრთხოება.
 
ენერგოეფექტურობის გაზრდა - თანამედროვე ინოვაციური ტექნოლოგიები, მზის პანელებიდან დაწყებული ჭკვიანი ქსელებით დამთავრებული, გვეხმარება ენერგიის უფრო გონივრულად გამოყენებაში, საერთო მოხმარებისა და გამონაბოლქვის შემცირებაში.
 
მდგრადობის ხელშეწყობა - განახლებადი ენერგიის წყაროები ამოუწურავია, რაც მათ ამოწურვადი წიაღისეული საწვავის მდგრად ალტერნატივად აქცევს. განახლებად ენერგიაზე გადასვლა ხელს უწყობს გრძელვადიან გარემოსდაცვით მდგრადობას და ამცირებს რესურსების მოპოვებისა და წვის უარყოფით ზემოქმედებას.
 
მწვანე სამუშაო ადგილების შექმნა და ეკონომიკური ზრდა: განახლებად ენერგიაზე გადასვლა ქმნის დასაქმების შესაძლებლობებს წარმოების, მონტაჟისა და ტექნიკური მომსახურების სექტორებში, რაც ხელს უწყობს ეკონომიკურ ზრდას და ამავდროულად დადებით გავლენას ახდენს კლიმატის ცვლილებაზე.
 
განახლებადი ენერგია კლიმატის ცვლილების შერბილების გლობალური ძალისხმევის სასიცოცხლო კომპონენტია, რომელიც გვთავაზობს წიაღისეული საწვავის მდგრად და ეკოლოგიურად სუფთა ალტერნატივას, ხელს უწყობს ეკონომიკურ ზრდას და კლიმატის ზემოქმედებისადმი მდგრადობას.