4 არასამთავრობო ორგანიზაცია მოუწოდებს საქართველოს მთავრობას შეასრულოს ევროკომისიის რეკომენდაცია, დაუბრუნდეს OECD/ACN პროცესს და ხელი არ შეუშალოს ქვეყნის ევროინტეგრაციის პროცესს.
მათი ინფორმაციით, საქართველოს მეოთხე წელია არ აქვს ეროვნული ანტიკორუფციული სტრატეგია და სამოქმედო გეგმა, რაც პირდაპირ მიუთითებს იმაზე, რომ ეროვნულ დონეზე კორუფციის წინააღმდეგ ბრძოლა ფაქტობრივად შეჩერებულია.
„ეკონომიკური თანამშრომლობისა და განვითარების ორგანიზაციამ (OECD) გამოაქვეყნა ანტიკორუფციული ქსელის (OECD/ACN) მიერ მომზადებული აზერბაიჯანის, მოლდოვას, სომხეთისა და უკრაინის ანტიკორუფციული გარემოს მონიტორინგის მე-5 რაუნდის ანგარიშები.
საქართველო ერთადერთი ქვეყანაა, რომელმაც უარი თქვა მონიტორინგის მე-5 რაუნდში მონაწილეობაზე, რომელიც მიზნად ისახავდა ქვეყნის ანტიკორუფციული რეფორმების შეფასებას შემდეგ სფეროებში: ეროვნული ანტიკორუფციული პოლიტიკა, სასამართლოს დამოუკიდებლობა, პროკურატურის დამოუკიდებლობა, რეაგირება. კორუფციულ სამართალდარღვევებს, სპეციალიზებულ ანტიკორუფციულ ინსტიტუტებს, ბიზნესის კეთილსინდისიერებას, სახელმწიფო შესყიდვებს, მამხილებელთა დაცვას, ინტერესთა კონფლიქტს და ქონებრივ დეკლარაციას.
მთავრობა ცდილობდა შეეჩერებინა OECD/ACN პროცესი ჯერ კიდევ 2021 წელს, როდესაც მე-5 რაუნდის საპილოტე ანგარიში მზადდებოდა. ანტიკორუფციული რეფორმების, განსაკუთრებით დამოუკიდებელი სასამართლო და პროკურატურის კომპონენტის კრიტიკის გამო, მთავრობამ წინააღმდეგობა გაუწია ანგარიშის გასაჯაროებას. 2023 წელს საქართველოს მთავრობამ 20 წლის განმავლობაში პირველად თქვა უარი მონიტორინგის რაუნდში მონაწილეობაზე.
ანტიკორუფციული ბიუროს შექმნის შემდეგ არსებობდა იმედი, რომ საქართველო ამ პროცესს დაუბრუნდებოდა, მაგრამ ეს ჯერ არ მომხდარა. ქვეყნის ანტიკორუფციული გარემოს შეფასება და გამოწვევების იდენტიფიცირება კრიტიკულად მნიშვნელოვანია ანტიკორუფციული ბიუროსთვის, რადგან ეს სააგენტო პასუხისმგებელია პოლიტიკის დოკუმენტების შემუშავებაზე. „მეოთხე წელია, საქართველოს არ გააჩნია ეროვნული ანტიკორუფციული სტრატეგია და სამოქმედო გეგმა, რაც პირდაპირ მიუთითებს იმაზე, რომ ეროვნულ დონეზე კორუფციის წინააღმდეგ ბრძოლა ფაქტობრივად შეჩერებულია“, - ნათქვამია ორგანიზაციების მიერ გავრცელებულ ინფორმაციაში.
"საქართველომ, ერთ დროს რეგიონში ანტიკორუფციული რეფორმების ჩემპიონმა, უარი თქვა მონიტორინგის მე-5 რაუნდში მონაწილეობაზე. OECD მოუწოდებს საქართველოს გადახედოს ამ გადაწყვეტილებას და კვლავ შეუერთდეს რეცენზირების პროგრამას კორუფციის წინააღმდეგ ბრძოლის გასაგრძელებლად." ნათქვამია OECD-ის განცხადებაში.
გარდა ამისა, OECD ასევე მოუწოდებს ქვეყნებს შეწყვიტონ სამოქალაქო საზოგადოების ორგანიზაციების შევიწროება, დაიცვან ისინი მუქარისა და დევნისგან და უზრუნველყონ მათი ჩართვა ანტიკორუფციულ რეფორმებში.
ევროკომისია ასევე მოუწოდებს საქართველოს დაუბრუნდეს OECD/ACN პროცესს. 2023 წლის ნოემბერში მომზადებულ ანგარიშში აღნიშნულია, რომ ევროკომისია მოელის საქართველოს მთავრობას გააუქმოს გადაწყვეტილება OECD/ACN-ის მონიტორინგის პროცესიდან გამოსვლის შესახებ და ასევე სრულად განახორციელოს მონიტორინგის წინა რაუნდის რეკომენდაციები.
ხელმომწერი ორგანიზაციები კიდევ ერთხელ მოუწოდებენ საქართველოს მთავრობას, შეასრულოს ევროკომისიის რეკომენდაცია, დაუბრუნდეს OECD/ACN პროცესს და ხელი არ შეუშალოს ქვეყნის ევროინტეგრაციის პროცესს“, - ნათქვამია „საერთაშორისო გამჭვირვალობა - საქართველოს“ მიერ ხელმოწერილ ინფორმაციაში. )"; "საქართველოს ახალგაზრდა იურისტთა ასოციაცია (საია)"; ინფორმაციის თავისუფლების განვითარების ინსტიტუტი (IDFI) და მმართველობის მონიტორინგის ცენტრი (GMC) წერენ.
წყარო: ipn
