აფხაზეთის დე ფაქტო რესპუბლიკის სკოლებში მათემატიკის, ფიზიკისა და ქიმიის პედაგოგების ნაკლებობაა. ამის შესახებ „განათლების მინისტრის მოადგილე“, ადა კვარჩელია „სპუტნიკთან“ ინტერვიუში აღნიშნავს. კვარჩელიას თქმით, ვითარება წელს განსაკუთრებით გამწვავდა.
„ვაგროვებთ ინფორმაციას სკოლების მიხედვით. მხოლოდ სოხუმში, მე-3 სკოლიდან 12 პედაგოგი წავიდა. არასაკმარისია მათემატიკის, ფიზიკისა და სხვა ისეთი საგნების პედაგოგები, რომლებზეც დამოკიდებულია ქვეყნის ტექნოლოგიური და ეკონომიკური დამოუკიდებლობა. ეს საკითხი სასწრაფოდ გადასაწყვეტია“, - ადა კვარჩელია ინტერვიუში აღნიშნავს ასევე, რომ სკოლებიდან პედაგოგების წასვლა ანაზღაურების სიმცირით არის განპირობებული.
კვარჩელიას თქმით, „დღეს კლასის დამრიგებლობისთვის მასწავლებელი 800 რუბლს [23 ლარი] იღებს“, ხოლო სოფლის სკოლებში მასწავლებელთა ხელფასი მნიშვნელოვნად ჩამოუვარდება ქალაქში დასაქმებული კოლეგების ანაზღაურებას.
წყარო: რადიო თავისუფლება
