საქსტატმა 2025 წლის ეკონომიკური ზრდის წინასწარი შეფასება გამოაქვეყნა, რომლის მიხედვითაც გასულ წელს საქართველოს ეკონომიკა 7.5%-ით გაიზარდა. საქართველოს ეკონომიკის ზომამ მიმდინარე ფასებში 104.6 მილიარდ ლარს მიაღწია, რაც აშშ დოლარში 38.1 მილიარდ დოლარს შეადგენს, ხოლო მშპ-მა ერთ მოსახლეზე საქართველოს ისტორიაში 10,000 დოლარის ნიშნულს პირველად გადააჭარბა და 10,296 დოლარს მიაღწია.

ეკონომიკის სექტორებს შორის გასულ წელს ყველაზე მაღალი ზრდა ინფორმაციის, კომუნიკაციის და IT სექტორში ფიქსირდებოდა, სადაც ზრდა 28.7% იყო. ზრდის ტემპით მეორე ადგილზეა განათლების სექტორი, სადაც მატება 24.5%-ს შეადგენდა, მესამე ადგილს კი საფინანსო სექტორი იკავებს 12.9%-იანი ზრდით.

2025 წელს საქართველოს ეკონომიკის სექტორების ზრდის ტემპი ასე ნაწილდება:

# ეკონომიკური საქმიანობის სახეები ზრდა/კლება 2025 წელს
1 ინფორმაცია და კომუნიკაცია, მათ შორის IT 28.7%
2 განათლება 24.5%
3 საფინანსო და სადაზღვევო საქმიანობები 12.9%
4 ადმინისტრაციული და დამხმარე მომსახურების საქმიანობები 12.4%
5 ხელოვნება, გართობა და დასვენება, მათ შორის აზარტული თამაშები 12.3%
6 ჯანდაცვა და სოციალური მომსახურების საქმიანობები 11.9%
7 სახელმწიფო მმართველობა და თავდაცვა; სავალდებულო სოციალური უსაფრთხოება 9.3%
8 ტრანსპორტი და დასაწყობება, ლოგისტიკა 8.9%
9 პროფესიული, სამეცნიერო და ტექნიკური საქმიანობები 8.3%
10 განთავსების საშუალებებით უზრუნველყოფის და საკვების მიწოდების საქმიანობები 5.6%
11 უძრავ ქონებასთან დაკავშირებული საქმიანობები 5.0%
12 წყალმომარაგება; კანალიზაცია, ნარჩენების მართვა და დაბინძურებისაგან გასუფთავების საქმიანობები 4.3%
13 დამმუშავებელი მრეწველობა 3.9%
14 საბითუმო და საცალო ვაჭრობა; ავტომობილების და მოტოციკლების რემონტი 3.8%
15 მშენებლობა 0.8%
16 სხვა სახის მომსახურება -1.5%
17 სამთო-მოპოვებითი მრეწველობა -3.0%
18 ელექტროენერგიის, აირის, ორთქლის და კონდიცირებული ჰაერის მიწოდება (ენერგეტიკა) -4.5%
19 სოფლის, სატყეო და თევზის მეურნეობა -5.7%
20 შინამეურნეობების, როგორც დამქირავებლის საქმიანობები; არადიფერენცირებული საქონლისა და მომსახურების წარმოება შინამეურნეობების მიერ საკუთარი მოხმარებისათვის -13.0%

რაც შეეხება აბსოლუტურ რიცხვებში ეკონომიკის დარგობრივ განაწილებას, პირველ ადგილს კვლავ ვაჭრობის სექტორი იკავებს, რომლის კონტრიბუციაც მშპ-ში 13.5 მილიარდი ლარი იყო; მეორე ადგილზეა უძრავი ქონების ოპერაციები 8.56 მილიარდი ლარით, მესამეზე კი დამამუშავებელი მრეწველობა 8.35 მილიარდი ლარის ზომით.