საქართველოში ტექნიკის მაღაზიათა რამდენიმე მსხვილი ქსელია, რომელთა წლიური ბრუნვაც პანდემიამდე 500 მლნ ლარს აჭარბებდა. მაღაზიებში კონსულტანტებისთვის ბაზისური ხელფასი ძალიან დაბალია და ანაზღაურება, ძირითადად, გაყიდვებზე მიბმულ ბონუსებზეა დამოკიდებული.
„ალტა“, „ოქეისთნ“ გაერთიანების შემდეგ, საქართველოში ყველაზე მსხვილი ტექნიკის მაღაზიათა ქსელი გახდა. რომელიც პარალელურად „მეტრომარტის“ 50%-იან წილსაც ფლობს. 2019 წელს ალტამ გაყიდვებით ყველაზე მეტი - 249 მლნ ლარიანი შემოსავალი მიიღო, საიდანაც მოგება 6 მლნ ლარს აჭარბებდა. 2019 წელს ალტაში 596 ადამიანი იყო დასაქმებული, სახელფასო ხარჯმა ადმინისტრაციისთვის 4.75 მლნ, დისტრიბუციისა და გაყიდვებისთვის კი 5.85 მლნ ლარი შეადგინა. საპენსიო შენატანისა და საშემოსავლოს დაქვითვის შემდეგ 1 თანამშრომლის საშუალო ხელზე ასაღები ხელფასი თვეში 1162 ლარს შეადგენდა.
ვაჭრობის ამ სეგმენტში ბრუნვითაც და დასაქმებულთა რაოდენობითაც მეორე ადგილს „ელიტ ელექტრონიქსი“ იკავებს. 2019 წელს კომპანიამ გაყიდვებიდან 177 მლნ ლარის შემოსავალი მიიღო. დასაქმებულთა რაოდენობამ კი 570 შეადგინა. რაც შეეხება სახელფასო ხარჯს სავაჭრო და ადმინისტრაციულ სეგმენტში 10.3 მლნ ხელმძღვანელი პირებისთვის კი 1.6 მლნ შეადგინა. გასაშუალოებული ხელფასი ამ შემთხვევაში 1364 ლარი გამოდის.
ალტასთან და ელიტ ელექტრონისქსთან შედარებით მცირე ზომისაა განსხვავებული სპეციფიკის მქონე ქსელი „ზუმერი“, რომელიც, ძირითადად, სმარტფონების ბაზარზეა ორიენტირებული, მაღაზიებიც მცირე ფართობის აქვს და დასაქმებულთა რაოდენობაც, 2019 წლის მონაცემებით, 200-ს შეადგენდა. ჯამურმა სახელფასო ანაზღაურებამ კი - 3.080 მლნ ლარი იყო. ჯამურთან ერთად, შედარებით დაბალია ინდივიდუალური ანაზღაურებაც - საშუალოდ 1006 ლარი.
კონსულტანტის ხელფასი გასაშუალებულზე დაბალია, მაგრამ ის მაინც მინიმუმ 2-ჯერ აღემატება სასურსათო სუპერმარკეტის მაღაზიის თანამშრომლის ხელფასს. საათობრივი დაანგარიშებით კიდევ უფრო მეტჯერ. ამასთან, დიდ მაღაზიებში, სადაც ყოველდღიური ნავაჭრი მეტია, თანამშრომლის ხელფასიც მცირე ზომის ფილიალთან შედარებით უფრო მეტი გამოდის.
2020 წლის ფინანსური ანგარიშგებები კომპანიებს ჯერ არ გაუსაჯაროებიათ. იმის გათვალისწინებით, რომ მაღაზიის თანამშრომლების ხელფასები გაყიდვებზეა მიბმული, მაღალი ალბათობით შეიძლება იმის დაშვება, რომ საშუალო ხელფასი მნიშვნელოვნად იქნება შემცირებული.