,,ბორჯომის“ დროებითი მართვა სავარაუდოდ მთავრობის ხელში გადავა. სპეციალისტები აღნიშნავენ, რომ კრიზისული სიტუაციის განმავლობაში სახელმწიფოს მოქმედი კანონის საფუძველზე შეუძლია კომპანიის მართვა საკუთარ თავზე აიღოს და არ დაუშვას საწარმოს გაჩერება. საკანონმდებლო ბაზა ჯერ კიდევ 2006 წელს შემუშავდა. როგორც ბიზნესის სფეროს იურისტი აკაკი ჩარგეიშვილი ,,კომერსანტთან“ განმარტავს, კანონი იძლევა საშუალებას, რომ ,,ბორჯომს“ სახელმწიფომ გაუწიოს ზედამხედველობა, თუმცა ცალსახად უარყოფითი ფაქტია, რომ პრევენციულ ზომებს დროულად არ მიმართეს, რაც კრიზისულ სიტუაციაში კომპანიას ძალიან დაეხმარებოდა.
,,პირველ ეტაპზე, რაც შეიძლება მთავრობამ გააკეთოს, ,,ბორჯომში“ დროებითი მმართველის დანიშვნაა. ამის გაკეთება შესაძლებელია. ,,ლიცენზირებისა და ნებართვების შესახებ საქართველოს კანონი“ არეგულირებს სალიცენზიო ურთიერთობებს. ხოლო იქიდან გამომდინარე, რომ კრიზისი რეალურად შექმნილია, კანონი იძლევა შესაძლებლობას, სახელმწიფომ მოახდინოს ადმინისტრირება, შეიყვანოს სპეციალური მმართველი კომპანიაში და ვიდრე პრობლემა არ მოგვარდება, ,,ბორჯომის“ მართვა ზედამხედველობის ქვეშ განხორციელდეს. სანქციებთან მიმართებაში საერთაშორისო საზოგადოების მიდგომა ვიცით, მაგრამ მოუმზადებელი შეხვდა ამ ამ პროცესს საქართველო, შეეძლოთ, რომ პრევენციული ღონისძიებები მიეღოთ, მოსალოდნელ შედეგზე წინასწარ ეფიქრათ. რეგულირების მხრივ პრობლემა ნამდვილად არ არის, როცა ინვესტორი არ ჩანს, პირდაპირი მმართველობა სახელმწიფოსია, მისი მეშვეობით ხდება დარეგულირება, კანონიც მზადაა, მთავარია გეგმაზომიერად, სწორად მოხდეს ქმედითი ნაბიჯების გადადგმა. სხვა გამოსავალი შექმნილ სიტუაციაში ფაქტობრივად არ ჩანს“, - ამბობს იურისტი ,,კომერსანტთან“.
შეგახსენებთ, რომ 29 აპრილს ბორჯომის ჩამომსხმელ ორივე ქარხანაში წარმოების პროცესი გაჩერდა.
როგორც კომპანიაში განგვიმარტეს, საბანკო ანგარიშებზე სრული წვდომის აღდგენისთანავე, „ბორჯომი“ არამარტო წარმოების პროცესს განაახლებს, არამედ ახალი ქარხნის მშენებლობასაც დაასრულებს.
საქართველოს მთავრობა იძლევა პირობას, რომ კომპანიის საწარმოო პროცესის აღსადგენად ,,ყველაფერს გააკეთებენ“, მაგრამ დეტალები, როგორ აპირებენ პრობლემის მოგვარებას, ჯერჯერობით უცნობია. საქართველოს ფინანსთა მინისტრმა ლაშა ხუციშვილმა მთავრობის ორშაბათის სხდომის შემდეგ გამართულ ბრიფინგზე განაცხადა, რომ ყველა ნაბიჯი გადაიდგმება კომპანია „ბორჯომმა“ პროდუქციის წარმოება რომ გააგრძელოს.
მისივე თქმით, კომპანიაში ძალიან ბევრი ადამიანია დასაქმებული და შესაძლოა უახლოეს მომავალში გახდეს ცნობილი, თუ რა ნაბიჯები გადაიდგმება წარმოების აღსადგენად.
მარი ჩიტაია