სახელმწფო ორგანოების გულგრილობა თუ ადგილობრივი თვითმმართველობის სავარაუდო კორუფციული გარიგება? გასულ კვირას „კომერსანტი“ სანდო წყაროზე დაყრდნობით წერდა, რომ მარნეულის მუნიციპალიტეტში, სავარაუდოდ ყოველგვარი ნებართვის გარეშე, უკანონოდ გაიჩეხა ორი ჰექტარი ტყის მასივი, დაიგო ასფალტი და აშენდა ორი ნაგებობა. მედიაჰოლდინგს სანდო წყარო უყვებოდა, რომ კონკრეტული ბიზნესს სუბიექტი მარნეულის მერიის თანამშრომლებთან სავარაუდო კორუფციული გარიგებით სოფელ ქუთლაირის მიმდებარე ტერიტორიაზე მიწის ნაკვეთს ტირ პარკის (ავტოსადგომი გადამზიდავი კომპანიებისთვის) ასაშენებლად ამზადებს.
„კომერსანტი“ დაინტერესდა წითელი ხიდის საბაჟო ზონასთან ახლოს მდებარე ტერიტორიაზე, ტყის მასივში სავარაუდო უკანონო მშენებლობა როგორ დარჩა ყველა სახელმწიფო სტრუქტურას შეუმჩნეველი.
დავიწყოთ ადგილობრივი თვითმართველობით, სადაც გაჩეხილი ტყის, გაყვანილი გზის და აგებული შენობების შესახებ ინფორმაცია არ აქვთ. მხოლოდ ჩვენი ზარის შემდეგ გადაწყვიტა მარნეულის მუნიციპალიტეტის ზედამხედველობის სამსახურმა ტერიტორიის შემოწმება. რა დაადგინეს მარნეულის მერიაში არ ვიცით, რამდენიმე დღიანი ლოდინის შემდეგ პრესსამსახურმა მოგვწერა, რომ ინფორმაცია ოფიციალურად უნდა გამოვითხოვოთ.
ინფორმაციის გამოთხოვა მოგვთხოვა, ქვემო ქართლში სახელმწიფო რწმუნებულის შოთა რეხვიაშვილის პრესსამსახურმაც. თავად გუბერნატორმა ჩვენს ზარებს რამდენიმე დღის განმავლობაში არ უპასუხა, რეხვიაშვილმა უპასუხოდ დატოვა სმს შეტყობინებებიც. არადა საქართველოს საკანონმდებლო მაცნეში, სახელმწიფო რწმუნებულის დებულების დამტკიცების შესახებ დოკუმენტში, შავით თეთრზე ვკითხულობთ, რომ სახელმწიფო რწმუნებულის – გუბერნატორის აპარატის ფუნქციებია:
- სახელმწიფო რწმუნებულის – გუბერნატორის სამოქმედო ტერიტორიაზე მიმდინარე მნიშვნელოვან მოვლენებთან დაკავშირებით ინფორმაციის მოპოვება და სახელმწიფო რწმუნებულის – გუბერნატორისა და შესაბამისი ორგანოებისათვის წარდგენა;
- სახელმწიფო რწმუნებულის – გუბერნატორის სამოქმედო ტერიტორიაზე საქართველოს საკანონმდებლო და კანონქვემდებარე ნორმატიული აქტების აღსრულების კოორდინაცია და კონტროლი;
- ადგილობრივი თვითმმართველობის ორგანოების საქმიანობის სამართლებრივი და დელეგირებული უფლებამოსილებების მათ მიერ სახელმწიფო ინტერესების შესაბამისად განხორციელების სახელმწიფო ზედამხედველობის უზრუნველყოფის მიზნით შესაბამისი ღონისძიებების გატარება;
მედიაჰოლდინგისთვის გაუგებარია სახელმწიფო უწყებების პოზიცია საჯარო ინფორმაციის გამოთხოვის შესახებ, რადგან საჯარო ინფორმაცია არის:
„ოფიციალური დოკუმენტი (მათ შორის ნახაზი, მაკეტი, გეგმა, სქემა, ფოტოსურათი, ელექტრონული ინფორმაცია, ვიდეო და აუდიოჩანაწერები), ანუ საჯარო დაწესებულებაში დაცული, აგრეთვე საჯარო დაწესებულების ან მოსამსახურის მიერ სამსახურებრივ საქმიანობასთან დაკავშირებით მიღებული, დამუშავებული, შექმნილი ან გაგზავნილი ინფორმაცია, ასევე საჯარო დაწესებულების მიერ პრაქტიკულად გამოქვეყნებული ინფორმაცია“.
„კომერსანტი“ ქვემო ქართლში სახელმწიფო რწმუნებულისგან და ადგილობრივი თვითმმართველობისგან კონკრეტული ფაქტის შესახებ კონკრეტულ კითხვებზე ითხოვდა პასუხებს. რაც ვერც ერთი უწყებისგან ვერ მოვისმინეთ.
მედიაჰოლდინგმა გაარკვია, რომ ტირ პარკს მარნეულში შპს „რედსტოპი“ აშენებს. კომპანია 2020 წლის 13 იანვარს დარეგისტრირდა და მისი დირექტორი გიორგი ბიწაძე იყო , ბიწაძე ამასთანავე „რედსტოპ“- ის 20 პროცენტი წილის მფლობელიც იყო. თავდაპირველად კომპანიას კიდევ 4 მეწილე ჰყავდა: ალექსანდრე ყურაშვილი, მიხეილ ქებაძე, ვასილ ფალავანდიშვილი და საბა ანთია. თითოეული მათგანი „რედსტოპ“- ის 20-20 პროცენტი წილის მფლობელები იყვნენ.
მეწარმეთა და არასამეწარმეო იურიდიული პირების რეესტრში, 2020 წლის 21 მაისს ცვლილება შედის, რომლის მიხედვითაც კომპანიის დირექტორის თანამდებობაზე საბა ანთია ინიშნება, ხოლო მეწილეთა რაოდენობა ორმაგდება:
14 პროცენტი წილის მმართველი ზურაბი კაპანაძეა, 13 პროცენტი ვაჟა ნემსაძეს ეკუთვნის, 13 პროცენტი კი თორნიკე ნემსაძეს. 12 პროცენტი წილის მმართველი გიორგი ბიწაძეა. ახალი გადანაწილებით, ძველი მეწილეები ალექსანდრე ყურაშვილი, მიხეილ ქებაძე, ვასილ ფალავანდიშვილი და საბა ანთია 8.75- 8,75 პროცენტის მფლობელები არიან. 8 პროცენტი კომპანიაში ანა ჯოხაძეს ეკუთვნის ხოლო, 5 ირაკლი ჯიშკარიანს.
ის რაზეც არ საუბრობენ სახელმწიფო სტრუქტურებში, ვკითხეთ შპს „რედსტოპ“ - ის დირექტორს საბა ანთიას. იგი აცხადებს, რომ სოფელ ქუთლიარის მიმდებარე ტერიტორიაზე სატყეო ტერიტორია არ გაჩეხილა, დაიგო მხოლოდ ასფალტის საფარი და აშენდა ორი ნაგებობა, რომლის უფლებაც ანთიას თქმით, კომპანიას ჰქონდა.
„ყველაფერი გაკეთებული გვაქვს ნებართვის საფუძველზე.საბუთები მოწესრიგებული გაქვს, დოკუმენტები შესაბამის სახელმწიფო სტრუქტურებში დაახლოებით 6 თვის წინ გადაიგზავნა. ჩვენ კომუნიკაცია გვქონდა როგორც ადგილობრივ თვითმმართველობასთან ასევე სახელმწიფო ქონების ეროვნულ სააგენტოსთანაც, ტერიტორია იჯარით სწორედ ქონების ეროვნულმა სააგენტომ გასცა“, - განაცხადა საბა ანთიამ.
ანთიძემ გვითხრა, რომ ყველა იმ დოკუმენტს გამოგზავნიდა, რომელიც ამტკიცებდა, რომ შპს „რედსტოპი“ ბიზნეს საქმიანობას კანონიერად აწარმოებს. კომპანიას უნდა გადმოეგზავნა დოკუმენტები, ტერიტორიის იჯარით აღების შესახებ, როდის გადასცა ქონების ეროვნულმა სააგენტომ მიწა და რა პირობით. ასევე დაგვპირდნენ მარნეულის მუნიციპალიტეტის მერიის ზედამხედველობის სამსახურის ნებართვას ტერიტორიაზე მშენებლობის დაწყების შესახებ. თუმცა, დაპირება დაპირებად დარჩა და არც ერთი ოფიციალური დოკუმენტი, რომელიც ამ კომენტარს დაადასტურებდა „კომერსანტს“ არ მიუღია.
ბაჩო ადამია