საქართველოს ეკონომიკა წელს შესაძლოა დაგეგმილზე თითქმის 2-ჯერ სწრაფად - 7.7%-ით გაიზარდოს. ამის შესახებ პრემიერ–მინისტრმა ირაკლი ღარიბაშვილმა მთავრობის ორშაბათის სხდომაზე განაცხადა.
2020 წელს პანდემიისა და მკაცრი კოვიდრეგულაციების შედეგად ეკონომიკურმა ვარდნამ 6.2%-ს მიაღწია, რაც 1994 წლის შემდეგ ყველაზე ცუდი მაჩვენებლი იყო. სექტემბრის ბოლოს, როდესაც მთავრობამ პარლამენტს 2021 წლის ბიუჯეტის პირველადი ვერსია წარუდგინა, მშპ-ს ზრდის ტემპად 5% განისაზღვრა, თუმცა მალევე ახალი შეზღუდვების დაწესების პარალელურად, სავალუტო ფონდის რჩევით, ბიუჯეტი 4.3%-იან ზრდაზე გადაიგეგმა. ეროვნული ბანკი 4%-იან ზრდას პროგნოზირებდა, თუმცა უშვებდა პესიმისტურ სცენარსაც, რომლის მიხედვითაც ზრდა მხოლოდ 1% შეიძლება ყოფილიყო.
იანვრის ლოკდაუნის დროს ორნიშნა ვარდნა განახლდა, რის შემდეგაც სავალუტო ფონდმა ზრდის ტემპის პროგნოზი 3.5%-მდე შეამცირა. უკეთესობისკენ ცვლილებები მარტიდან დაიწყო. მარტში, 12 თვიანი რეცესიის შემდეგ პირველად, 4%-იანი ზრდა დაფიქსირდა, აპრილში კი ზრდის ტემპმა 45%-ს მიაღწია, რამაც მოწონებასთან ერთად გარკვეული ეჭვებიც გააჩინა. აპრილთან შედარებით დაბალი, მაგრამ მაინც საკმაოდ მაღალი 25%-იანი იყო მაისის ეკონომიკური ზრდაც.
საერთაშორისო სავალუტო ფონდისგან განსხვავებით, მსოფლიო ბანკმა საქართელოს ზრდის ტემპის პროგნოზი 6.1%-მდე გაუუმჯობესა.
ტურიზმის დაგეგმილზე დაბალი ტემპით აღდგენასთან ერთად, ერთ-ერთ მთავარ გამოწვევად მაღალი ინფლაცია რჩება. იმ ფონზე, როდესაც საქსტატი ბიუჯეტიდან სუბსიდირებულ პროდუქციას სამომხმარებლო ფასების ზრდაში არ ასახავს, ივნისში ინფლაციამ 10 წლიან მაქსიმუმს – 9.9%-ს მიაღწია.