ლარის მიმდინარე კურსი 3.45-ს გადასცდა, რაც 1 კვირის წინანდელ მაჩვენებელთან შედარებით 12 თეთრით მეტია. საწვავის საცალო ფასებზე გაუფასურებული ლარის გავლენის შესაფასებლად "კომერსანტი" ნავთობპროდუქტების იმპორტიორთა კავშირის პრეზიდენტს ვანო მთვრალაშვილს დაუკავშირდა.
ვანო მთვრალაშვილი ადასტურებს, რომ ლარის ვარდნა საწვავის ფასზე უარყოფითად აისახება. მისი განმარტებით საქართველოში ბენზინისა და დიზელის ღირებულებაზე გავლენას ძირითადად ორი ფაქტორი ახდენს: საერთაშორისო პლატსის ფასი და ვალუტის კურსი. როდესაც ლარმა გაუფასურება დაიწყო, პირველი ფაქტორის გავლენა ჯერ ბოლომდე ამოწურული არ იყო, შესაბამისად დამატებით კურსის ზეწოლა ფასების ზრდის ახალ ტალღას გამოიწვევს.
'კომერსანტის" კითხვაზე თუ რამდენ ხანში აისახება კურსის გავლენა საცალო ფასებზე და რა მოცულობით ნავთობპროდუქტების იმპორტიორთა კავშირის პრეზიდენტმა კონკრეტული პასუხის გაცემისგან თავი შეიკავა, თუმცა აღნიშნა, რომ წინა პერიოდში იმპორტიორები ფასებს 3-5 თეთრიანი ბიჯებით ზრდიდნენ.
საწვავი საკმაოდ არაელასტიური პროდუქტია და მისი ფასის ზრდა მოხმარებას ან საერთოდ ვერ ამცირებს, ან ამცირებს, მაგრამ ბევრად ნაკლები მოცულობით. ვანო მთვრალაშვილის განმარტებით შეზღუდვების, კონკრეტულად კი კომენდანტის საათის გამო მოხმარება მაინც შემცირდა. რაც შეეხება გასულ წელს დაფიქსირებული მცირედ ზრდას, გაიზარდა 0.9%-ით 1.106 მლნ ტონამდე, მისი მიზეზი იაფი ნავთობის პერიოდში მარაგების შექმნა გახდა. იმპორტიორებმა იმავე და ოდნავ მეტი მოცულობის ნავთობშიც 2020 წელს $259 მლნ-ით ნაკლები - $498 მლნ გადაიხადეს.
31 მარტის მდგომარეობით, ბრენდირებულ ბენზინგასამართ სადგურებზე ყველაზე დაბალფასიანი რეგულარის ტიპის ბენზინის ფასი 2.53 ლარიდან იწყება და 2.63-ზე ადის. პრემიუმის ფასები 2.73-2.79 ლარის ფარგლებში მერყეობს, დიზელის მინიმალური ფასი 2.53 ლარია, მაქსიმალური - 2.76.
რადგან გაძვირებული საწვავის ტრანსპორტირების ხარჯებს ზრდის, ის კურსთან ერთად იმპორტირებული პროდუქციის ფასზებზე დამატებით ზეწოლას ახდენს და ინფლაციას აჩქარებს.
ბოლო პერიოდში საწვავზე აქციზის განახევრების იდეა პოპულარული გახდა, ასეთი გადაწყვეტილების მიღების შემთხვევაში პირდაპირი დათვლებით 1 ლიტრი ბენზინის ფასი 19 თეთრით შემცირდებოდა, თუმცა ამავე დროს ბიუჯეტს შემოსავლების სახით 276 მლნ ლარი დააკლდებოდა.
გიორგი ელიზბარაშვილი