კომპანია „მეტრო ჰოლდინგმა“ და ყოფილი ვიცე-პრემიერის დიმიტრი ქუმსიშვილის კომპანია „ახალი საინვესტიციო შესაძლებლობებმა“ ,,საერთაშორისო სადაზღვევო კომპანია კამარა“ წლის დასაწყისში იყიდა. თებერვლიდან დაიწყო კომპანიის რებრენდინგი, შეიცვალა სახელი და გახდა „გრინ დაზღვევა საქართველო / GREEN INSURANCE GEORGIA”. გარდა ამისა, მიღებული იქნა გადაწყვეტილება საწესდებო კაპიტალის 10,000,000 ლარამდე ზრდასთან დაკავშირებით.
„კომერსანტი“ დაინტერესდა რა სიახლეები შემოიტანა სადაზღვევო ბაზარზე „გრინ დაზღვევა საქართველომ“ მას შემდეგ, რაც მისი აქციების მფლობელები უმსხვილესი კომპანიები სს „მეტრო ავრასია ინვესთმენთ ჯორჯია“ და შპს „ახალი საინვესტიციო შესაძლებლობები“ გახდნენ, რომლებმაც საწესდებო კაპიტალი რამდენიმე მილიონამდე გაზარდეს და სადაზღვევო სექტორის განვითარებაში დიდი წვლილის შეტანა და კონკურენტუნარიანი პროდუქტების დანერგვა დააანონსეს. აღსანიშნავია, რომ „მეტრო ჰოლდინგის“ დამფუძნებლი გალიფ ოზთურქი, რომლის ანგარიშზე საქართველოში 3 000-მდე დასაქმებული და მილიარდობით ინვესტიციაა, პირველ სამ წელიწადში „გრინ დაზღვევის“ სადაზღვევო ბაზრის ხუთეულში მოხვედრას გეგმავს.
„გრინ დაზღვევა საქართველოს“ სამეთვალყურეო საბჭოს თავმჯდომარე და საქართველოს ყოფილი ვიცე-პრემიერი დიმიტრი ქუმსიშვილი „კომერსანტთან“ საუბრისას აღნიშნავს, რომ ამ ეტაპზე ორგანიზაციის აქციების საჯარო განთავსებისთვის მზადება მიმდინარეობს, თუმცა კორონავირუსმა კომპანიის განვითარების გეგმები შეაფერხა.
„ამ ეტაპზე მიმდინარეობს კომპანიის როგორც სტრუქტურული, ასევე შინაარსობრივი ცვლილება. ვემზადებით აქციების საჯარო განთავსებისთვის, რაც ძალიან მნიშვნელოვანი იქნება კომპანიის ცხოვრებაში და დიდ ცვლილებებს მოუტანს. ყალიბდება გუნდი, რომელმაც ბაზარზე აქტიურად უნდა იმუშავოს, შესაბამისად მიმდინარეობს მზადება იმ პროცესებისთვის, რომელიც ხელს შეუწყობს კომპანიას ბაზარზე აქტიურ დამკვიდრებას. სამწუხაროდ, Covid 19-ის ფაქტმა მცირედით შეაფერხა კომპანიის განვითარების სიჩქარე, მაგრამ ახლა ვიმედოვნებთ რომ რაც დაგეგმილი გვაქვს, იმას განვახორციელებთ.
თავისი ოპერაციებით „გრინ დაზღვევა“ საკმაოდ პატარა კომპანიაა, სადაზღვევო ბაზარი კი ძალიან კონკურენტული, შესაბამისად ძალიან დიდი ენერგია იქნება ჩასადები ბაზრის წილის მოსაპოვებლად. თუმცა, ერთის მხრივ სადაზღვევო ბაზარი ძალიან კონკურენტულია და მეორეს მხრივ აქვს ძალიან დიდი პერსპექტივა. სწორედ ეს პერსპექტივა გვაძლევს იმის თქმის საშუალებას, რომ ნამდვილად ღირს ამ ბაზარზე მუშაობა, მისთვის ბრძოლა და ახალი პროდუქტების დამკვიდრება. მიუხედავად კონკურენტული ბაზრისა, ღრმად მწამს, რომ ამ მიმართულებით განსავითარებელი ძალიან ბევრია, ასევე ბევრი ახალი და საინტერესო პროდუქტის შემოტანა იქნება შესაძლებელი“, - აღნიშნავს დიმიტრი ქუმსიშვილი.
დიმიტრი ქუმსიშვილი განმარტავს, რომ სხვადასხვა პარტნიორებთან ერთად, კერძო სექტორში, ძალიან აქტიურად მუშაობს სტარტაპ და ელექტრონული კომერციის ეკოსისტემის განვითარებაზე, ქვეყანაში ინვესტიციების და საუკეთესო საერთაშორისო კომპანიების მოზიდვაზე.
„გრინ დაზღვევისთვის“ ორი მიმართულებაა საინტერესოა, ერთი ეს არის თვითონ კონკურენცია. ამ მხრივ ბაზარზე არსებული პროდუქტები ყველა მიმართულებით იქნება ჩვენი მხრიდან შეთავაზებული. მეორე მიმართულება ის არის, რომ ვფიქრობთ ინოვაციური პროდუქტების შემოტანას და ამ მიმართულებების დანერგვას. ბაზარი შეზღუდულია და აქ ბევრი მოთამაშე ცდილობს თავისი წილი მოიპოვოს, თუმცა ბევრი მოთამაშის არსებობა მომხმარებლებისთვის კარგია, რადგან როცა კონკურენცია მაღალია, უფრო და უფრო კარგი პირობების შეთავაზება ხდება მათთვის. მეორე საკითხია ის, რომ მთლიანად მთელი ბაზარი გაიზარდოს. მე პირადად მეორე ნაწილი ძალიან მაინტერესებს, თუ როგორ არის შესაძლებელი ბაზრის მოცულობის ზრდა, ამ მხრივ კი ჩემი ხედვის გარდა მნიშვნელოვანია კვლევებიც, სადაც შედარებულია განვითარებადი ქვეყნების ბაზრები და სრულიად რეალურია საქართველოს სადაზღვევო ბაზრის ზრდა.
ინოვაციური პროდუქტები ვახსენე და მიმაჩნია, რომ ძალიან მნიშვნელოვანი და საინტერესოა უმუშევრობის დაზღვევის კარგად განვითარება, რასაც „გრინ დაზღვევა“ გეგმავს. კიდევ არის ბევრი პროდუქტები რომელიც დღეს ბაზარზე ასე მკაფიოდ არ არის წარმოდგენილი და გუნდის შიგნით აქტიურად ვმუშაობთ, რომ სწორად დავინახოთ თუ სად და რა მიმართულებით შეიძლება ბაზარზე შესვლა და დამკვიდრება. რაც შეეხება კომპანიის ყიდვის შემდეგ განხორციელებულ ცვლილებებს, მართალია პანდემიამაც ხელი შეგვიშალა, მაგრამ ბევრი დროც არ გასულა, რომ ძირეული ცვლილებები მოგვესწრო, თუმცა ასევე ვფიქრობ რომ ადამიანი კმაყოფილებას არ უნდა მიეცეს, შესაბამისად კიდევ ბევრი გვაქვს სამუშაო“, - აცხადებს ქუმსიშვილი.
აღსანიშნავია, რომ 2020 წლის 6 თვის მონაცემებით, მოზიდული სადაზღვევო პრემიით „გრინ დაზღვევა საქართველო“ მე-17 ადგილზეა (1.64 მლნ. ლარი), რაც წინა წლის ანალოგიური პერიოდისგან უმნიშვნელოდ განსხვავდება, 2019 წლის 6 თვეში ეს მონაცემი 1.61 მლნ. ლარს გაუტოლდა. რაც შეეხება ზარალს, 2020 წლის II კვარტალში, კომპანიამ 90 000 ლარის ზარალი აანაზღაურა.
ნინო თამაზაშვილი