თბილისში სატრანსპორტო რეფორმის ფონზე, რა დროსაც ძველი ავტობუსები ახლით ნაცვლდება და მათი რაოდენობა იზრდება, კვლავ რჩება ადგილები, სადაც საზოგადოებრივი ტრანსპორტის ლოდინის დრო ან 40 წთ-ს აღემატება, ან საერთოდ არ დადის. ერთ-ერთი ასეთი უბანი ბეთანიაა, სადაც მოხვედრა მხოლოდ კერძო ავტომობილით, ან ტაქსითაა შესაძლებელი.
როგორც Commersant-ს თბილისის ტრანსპორტისა და ურბანული განვითარების სააგენტოდან აცნობეს, მერია დამატებით მიკროავტობუსების შესყიდვას გეგმავს და მაქსიმუმ წლის ბოლომდე წყნეთიდან ბეთანიამდე მუნიციპალური მიკროავტობუსი დაიწყებს მოძრაობას.
დედაქალაქის ცენტრში და ძველ გარეუბნებში: გლდანი, ვარკეთილი – გადაადგილება პრობლემა განსაკუთრებულად მწვავედ არ დგას. შესაძლოა ავტობუსი გადაჭედილი იყოს და მოკლე მანზილზეც კი მგზავრს გადაჯდომა მოუწიოს, მაგრამ ტრანსპორტი მაინც არის. რასაც ვერ ვიტყვით თბილისის ახლად შემოერთებულ უბნებზე. ბოლო დრომდე პრობლემას დიდი დიღომიც წარმოადგენდა, სადაც, ძირითადად, მიკროავტობუსი მოძრაობდა. რამდენიმე ხაზის დამატების შემდეგ პრობლემა ნაწილობრივ მოგვარდა.
თბილისის მაცხოვრებლებს კოჯორში, ტაბახმელაში, წყნეთსა და კიკეთში მოსახვედრად შესაბამისი ავტობუსის გამოჩენამდე საკმო დროის ლოდინი უწევთ, ბეთანიაში ავტობუსით მისვლა კი შეუძლებელია, ხაზი ჯერ კიდევ არ არსებობს.
თბილისის მერიისთვის მიკროავტობუსი მხოლოდ მომსახურების დამატებით საშუალებას წარმოადგენს და მისი რაოდენობის განახევრებას - 1000-მდე შემცირებას გეგმავს. ისინი ძირითადად გარეუბნებში და ვიწრო ქუჩებში ივლიან. მთავარი აქცენტი კი ავტობუსებზე კეთდება და მათი რაოდენობა 972-მდე იზრდება. მათ შორის იქნება 200 ერთეული 18–მეტრიანი ავტობუსიც. დაგეგმილია მეტროს ვაგონების რაოდენობის გაზრდაც. რაც შეეხება ტრამვაის პროექტს, მას სიძვირის გამო უარი ეთქვა.