ბოლო 20 წლის განმავლობაში სააფთიაქო ქსელებმა მცირე ზომის აფთიაქები ჩაანაცვლეს. შესასრულებელი რეგულაციების სირთულის გათვალისწინებით, ჩანაცვლების პროცესი ფარმაცევტულ ბაზარზე, სასურსათო მაღაზიებთან შედარებით, უფრო სწრაფი იყო. 2019 წლის 31 დეკემბრის მდგომარეობით 3 უმსხვილესი ფარმაცევტული ქსელი ქვეყნის მასშაბით 799 აფთიაქს ფლობდა. დღეს მათი რიცხვი 800-ს აჭარბებს.
1994 წელს 14 ნოემბერს ბაზარზე „ავერსი“ გამოჩნდა. კომპანიის ძირითად საქმიანობას სააფთიაქო ქსელის მეშვეობით მედიკამენტებისა და ჰიგიენური საშუალებების რეალიზაცია წარმოადგენს. ავერსი ფლობს ასევე სადაზღვეო კომპანიას, ფარმაცევტულ საწარმო "ავერსი რაციონალსა" და კლინიკებს. საქართველოს მასშტაბით ავერსის საკუთრებაში სულ 281 აფთიაქია, 123 თბილისში და 158 რეგიონებში.
PSP-ს ქსელის განვითარება საქართველოში 1994 წელს დაიწყო. 2019 წლის 31 დეკემბრის მდგომარეობით კომპანია ქვეყნის მასშტაბით 235 აფთიაქს ფლობდა. მასვე ეკუთვნის საავადმყოფო „ჯეო ჰოსპიტალსი“, სადაც 1600 ადამიანი იყო დასაქმებული. ფინანსურ ანგარიშგებაში აფთიაქების თანამშრომელთა რაოდენობა მითითებული არ ყოფილა, აღნიშნული იყო მხოლოდ ჯამური სახელფასო ხარჯის - 66 მლნ ლარი, რის გამოც საშუალო ხელფასის დადგენა ვერ მოხერხდა.
„ჯიპისი“ 1995 წელს დაარსდა. 2008 წელს კომპანია სააქციო საზოგადოებად გადაკეთდა. 2016 წელს „საქართველოს ჯანდაცვის ჯგუფმა“ კომპანიის აქციების 100% შეიძინა და იმისი იურიდიული დასახელება „გეფად“ გადაკეთდა. 2017 წელს კი მან „ფარმადეპოს“ აქციების 67%-ც შესისყიდა. 2019 წლის 31 დეკემბრის მდგომარეობით ჯგუფი ჯამში 296 აფთიაქს ფლობდა, 26-ით მეტს 2018 წლის ანალოგიურ პერიოდთან შედარებით. 2018 წლის 31 დეკემბრის მდგომარეობით ჯგუფი 4050 ადამიანს ასაქმებდა. იმავე წელს გაცემული ხელფასების მოცულობამ 46 მლნ ლარი შეადგინა. საპენსიო შენატანისა და საშემოსავლოს დაქვითვის შემდეგ, 1 თანამშრომელზე გასაცემი ხელზე ასაღებმა საშუალო ხელფასმა 742 ლარი შეადინა. 2019 წელს გასაცემი ხელფასების მოცულობა 51 მლნ-მდე გაიზარდა, თუმცა ამ პერიოდისთვის თანამშრომელთა რაოდენობა მითითებული აღარ არის.
საშუალო ხელფასი აფთიაქებშიც დაბალია, თუმცა გეფას მაგალითზე შეიძლება ითქვას, რომ სასურსათო მაღაზიებთან შედარებით მაინც 1.5-ჯერ მეტია. ხოლო თუ ანაზღაურებას საათობრივად დავთვლით, რაც უფრო სამართლიანი მიდგომაა, მაშინ 2-ჯერ მეტი.