საფრანგეთის პრეზიდენტმა, ემანუელ მაკრონმა, მომავალი წლის ზაფხულიდან, ნებაყოფლობითი სამხედრო სამსახურის შემოღება დააანონსა. ის 10 თვეს გაგრძელდება. 18-დან 25 წლამდე ასაკის ფრანგები საკუთარი ქვეყნის ტერიტორიაზე იმსახურებენ და თვეში 800 ევროს მიიღებენ. რეფორმის მიზანია 3 ათასი მოხალისის ეტაპობრივად რეკრუტირება და 2030 წლისთვის მათი რაოდენობის 10 ათასამდე, ხოლო 2035 წლისთვის - 50 ათასამდე გაზრდა.
მაკრონმა განმარტა, რომ ეროვნულ სამხედრო სამსახურში მყოფ მოხალისეებს უკრაინაში არ გაგზავნიან.
საფრანგეთის პრეზიდენტის თქმით, ქვეყანა შეიარაღებული ძალების გაძლიერებას ევროპული სახელმწიფოების მიმართ რუსეთიდან მომდინარე მზარდი საფრთხის ფონზე აპირებს.
სავალდებულო გაწვევის აღდგენის საკითხი, რომელიც საფრანგეთმა 1996 წელს გააუქმა, ჯერჯერობით, არ განიხილება.
ემანუელ მაკრონი, საფრანგეთის პრეზიდენტი: „ამ სამსახურს სამი კონკრეტული მიზანი ექნება - ერსა და არმიას შორის კავშირის გაძლიერება, ეროვნული მედეგობის გაზრდა და ჩვენი ახალგაზრდების მომზადების გაუმჯობესება“.
რუსეთიდან მომდინარე მზარდი საფრთხისა და უკრაინის ომით განპირობებული რისკების გამო, სამხედრო სამსახურის თემა ევროპის ბევრი ქვეყანის ყურადღების ცენტრში მოექცა.
სავალდებულო სამხედრო სამსახური 8 ქვეყანაში აქამდეც არსებობდა. დანიაში ის ახლა 4-დან 11 თვემდე გაიზარდა და ქალებისთვისაც სავალდებულო გახდა.
ფინეთში სამხედრო ვალდებულების მოხდის პერიოდი 9-დან 12 თვემდე გრძელდება. ქალებისთვის ის ნებაყოფლობითია.
ნორვეგიაში ყველა 1 წელს მსახურობს, ესტონეთში კი - 8-დან 11 თვემდე, რაც ქალებისთვის ნებაყოფლობითია.
საბერძნეთსა და კვიპროსში სამხედრო სამსახურის ვადა, შესაბამისად, 12 და 14 თვემდეა. სუსტი სქესის წარმომადგენლებისთვის ორივე ქვეყანაში ის ნებაყოფლობითია.
ავსტრიასა და შვეიცარიაში, რომლებიც ნეიტრალური ქვეყნებია, სამხედრო სამსახური მხოლოდ კაცებისთვის არის სავალდებულო და შესაბამისად, 6 და 9 თვეს გრძელდება.
ლიეტუვა იყო პირველი ქვეყანა, რომელმაც 2015 წელს კაცებისთვის სავალდებულო სამხედრო სამსახური აღადგინა. მათი გაწვევა შემთხვევითობის (ლატარიის) პრინციპით ხდება, ქალებისთვის კი ნებაყოფლობითია.
შვედეთმა სავალდებულო სამხედრო სამსახური 7-წლიანი პაუზის შემდეგ, 2017 წელს აღადგინა. ის ყველასთვის სავალდებულოა და 9-დან 15 თვემდე გრძელდება.
სავალდებულო სამხედრო სამსახური 2 წლის წინ ლატვიამაც აღადგინა და კაცებისთვის ის 11 თვის განმავლობაში გრძელდება, ქალებისთვის კი ნებაყოფლობითია.
2008 წელს სავალდებულო გაწვევას გაუქმების შემდეგ, ხორვატია მას მომავალი წლიდან აღადგენს.
ბულგარეთი, საფრანგეთის მსგავსად, ნებაყოფლობით სამხედრო სამსახურს ანიჭებს უპირატესობას, რომელიც 2020 წელს აღადგინა და 6-თვიანია.
ნებაყოფლობით საწყისებზე სამხედრო სამსახურს ანიჭებს უპირატესობას ნიდერლანდებიც, თუმცა - 1 წლიანი ვადით. მომავალი წლიდან 12-თვიანი ნებაყოფლობითი სამხედრო წვრთნა ხელმისაწვდომი იქნება ბელგიაშიც (როგორც კაცებისთვის, ისე ქალებისთვის), ასევე რუმინეთში, ოღონდ - 4 თვით.
წყარო: 1 არხი
