ბათუმში მდებარე 5-ვარსკვლავიანი სასტუმრო The Grandeur Hotel-ი $22 მილიონად იყიდება.
სასტუმრო დაახლოებით წელიწად-ნახევრის წინ გაიხსნა და ის ბათუმის სანაპიროზე მდებარეობს. კომპანიის ინფორმაციით, The Grandeur Hotel-ი 100-ზე მეტ ნომერს მოიცავს.
„სასტუმრო Grandeur Hotel შეიქმნა ფუფუნებისა და დახვეწილობის მაგალითად. მდიდრული იახტის თანამედროვე ფორმით შთაგონებული სასტუმროს უნიკალური დიზაინი ნავის ფორმას წააგავს, რაც მას უდაოდ გამორჩეულს ხდის.
Grandeur Hotel არის პრესტიჟული White Sails კომპლექსის ნაწილი, ექსკლუზიური ადგილი საკურორტო სტილის მოგზაურებისთვის, რომლებიც ეძებენ მაქსიმალურ კომფორტს. როგორც Grandeur Hotel-ის სტუმარი, თქვენ გექნებათ წვდომა White Sails-ის კომპლექსში შემავალ ყველა ობიექტზე, მათ შორის ღია აუზზე თავისი ბარით და ცოცხალი მუსიკით“, - ნათქვამია სასტუმროს ვებ-გვერდზე.
ცნობისთვის, White Sails ბათუმში ზღვის პირველ ზოლში, ახალი ბულვარის ტერიტორიაზე მდებარეობს და ჯამში 30,000 კვ.მ. ფართობს მოიცავს. მულტიფუნქციურ კომპლექსში გაერთიანებულია ოთხი აპარტოტელი, პრემიუმ კლასის ბუტიკური ტიპის მრავალფუნქციური საცხოვრებელი Sea Home Batumi, სასტუმრო Ibis Styles Batumi-ი და 5 ვარსკვლავიანი საინვესტიციო პროექტი The Grandeur Hotel.
შპს „ეარ მერიდიანსი“, რომელიც White Sails-ის ბრენდის ქვეშ ფუნქციონირებს, 2015 წელს დაფუძნდა, იმავე წელს კომპანიამ 3 ჰექტარამდე ფართობი ზღვასთან ახლოს თითქმის 3 მლნ დოლარად და 30-მილიონიანი ინვესტიციის განხორციელების ვალდებულებების შესრულების პირობით იყიდა.
შპს „ეარ მერიდიანსის“ 100%-ს შპს „ბივისი“ ფლობს, რომელიც თავის მხრივ ეკუთვნის ასთამურ ჩაზმავას (50%) და საქართველო-რუსეთის ორმაგ მოქალაქეს რეფიყ კაიტამბას (50%).
