რუსეთის მიერ უკრაინაზე ღამით განხორციელებული მასიური თავდასხმის გამო, პოლონეთმა საჰაერო თავდაცვის სისტემები სრულ მზადყოფნაში მოაქცია. ამის შესახებ პოლონეთის შეიარაღებული ძალების ოპერატიულმა სარდლობამ განაცხადა.
განცხადების თანახმად, აღნიშნული ქმედებები პრევენციული ხასიათისაა და მიზნად ისახავს საჰაერო სივრცის უსაფრთხოების უზრუნველყოფას. სარდლობის ცნობით, ისინი აკვირდებიან მიმდინარე სიტუაციას და მზადყოფნაში არიან დაუყოვნებელი რეაგირებისთვის.
„გთხოვთ გაითვალისწინოთ, რუსეთის ფედერაციის მიერ უკრაინის ტერიტორიაზე განლაგებულ სამიზნეებზე თავდასხმის გამო, სამხედრო ავიაცია პოლონეთის საჰაერო სივრცეში მოქმედებს. მოქმედი პროცედურების შესაბამისად, პოლონეთის შეიარაღებული ძალების ოპერატიულმა სარდლობამ გაააქტიურა მის განკარგულებაში არსებული საჭირო ძალები და რესურსები. გამანადგურებლები აფრინდნენ, ხოლო სახმელეთო საჰაერო თავდაცვისა და რადარის დაზვერვის სისტემები მზადყოფნის მდგომარეობაშია.
ეს ქმედებები პრევენციული ხასიათისაა და მიზნად ისახავს საჰაერო სივრცის უსაფრთხოებას და დაცვას, განსაკუთრებით საფრთხის ქვეშ მყოფი ტერიტორიების მიმდებარე ტერიტორიებზე. პოლონეთის შეიარაღებული ძალების ოპერატიული სარდლობა აკვირდება არსებულ სიტუაციას და ძალები და რესურსები მზადყოფნაში რჩებიან დაუყოვნებლივი რეაგირებისთვის“, – ნათქვამია განცხადებაში.
მოლდოვის საჰაერო სივრცე დრონების შეჭრის გამო დროებით დახურეს, - ინფორმაციას ადგილობრივი მედია ავრცელებს.
მედიის ინფორმაციით, ღამით ორი დრონი ვორონკოვოს რაიონში შეფრინდა.
მოლდოვის სასაზღვრო პოლიციის განცხადებით, საჰაერო სივრცეში დრონების შეფრენის შესახებ უკრაინელმა მესაზღვრეებმა აცნობეს.
სიფრთხილის მიზნით, მოლდოვაში საჰაერო სივრცე დროებით დახურეს, თუმცა ჩრდილოეთ რეგიონის გარდა, მალევე გახსნეს.
მოლდოვის ხელისუფლებამ განაცხადა, რომ ტერიტორიის შემოწმების შემდეგ მოსახლეობისთვის საფრთხის შემცველი ობიექტი არ აღმოუჩენიათ.
