პარიზის ერთ-ერთი მთავარი სიმბოლო, ეიფელის კოშკი, ისტორიულ განახლებას გადის — კოშკზე პირველად გამოჩნდება ქალ მეცნიერების სახელებიც. აქამდე აქ მხოლოდ მამაკაცების სახელებს ნახავდით.
ეიფელის კოშკზე XIX საუკუნიდან ამოტვიფრულია 72 ფრანგი მეცნიერის, ინჟინრისა და მათემატიკოსის გვარი, რომლებიც გუსტავ ეიფელმა მეცნიერებისა და ტექნოლოგიური პროგრესის სიმბოლოდ შეარჩია. თუმცა ყველა ეს სახელი მამაკაცს ეკუთვნის. ახლა კი პარიზის მერია და კოშკის ადმინისტრაცია გეგმავენ, ამ სიას 72 ქალი მეცნიერის სახელიც დაემატოს.
ინიციატივა პარიზის მერმა ან იდალგომ წარადგინა. პროექტი კომპანია SETE-ის, რომელიც ეიფელის კოშკს მართავს, და ორგანიზაცია Femmes & Sciences-ის მხარდაჭერით ხორციელდება. ახალი სახელების დამატება 2027 წლისთვის იგეგმება.
სიის შედგენაში მონაწილეობდნენ ისტორიკოსები, მეცნიერები და აკადემიური წრეების წარმომადგენლები. კანდიდატებს შორის არიან ფიზიკოსები, მათემატიკოსები, ასტრონომები, ბიოლოგები და ქიმიკოსები, რომლებმაც მეცნიერების განვითარებაში მნიშვნელოვანი როლი ითამაშეს, თუმცა ისტორიულად ნაკლებად იყვნენ აღიარებულნი.
პროექტის ავტორები აცხადებენ, რომ ინიციატივის მიზანი ისტორიული ბალანსის აღდგენა და მეცნიერებაში ქალების წვლილის უფრო თვალსაჩინოდ წარმოჩენაა. მათი თქმით, ეიფელის კოშკი მხოლოდ ტურისტული ობიექტი აღარ არის — ის თანამედროვე სოციალური და კულტურული დისკუსიების ნაწილიც გახდა.
ანალიტიკოსები აღნიშნავენ, რომ მსგავსი ცვლილებები პარიზის ტურისტულ და კულტურულ პოლიტიკასაც უკავშირდება. ეიფელის კოშკი ყოველწლიურად დაახლოებით 6-7 მილიონ ვიზიტორს მასპინძლობს და საფრანგეთის ეკონომიკისთვის ერთ-ერთი ყველაზე მნიშვნელოვანი ტურისტული აქტივია. სპეციალისტები მიიჩნევენ, რომ კულტურული და სოციალური განახლებები ისტორიული მონუმენტების მიმართ ინტერესს ზრდის და მათ თანამედროვე აუდიტორიასთან უფრო ახლოს აყენებს.
ექსპერტების შეფასებით, მსოფლიო ტურიზმის ინდუსტრიაში სულ უფრო იზრდება მოთხოვნა იმ კულტურულ სივრცეებზე, რომლებიც არა მხოლოდ ისტორიულ მემკვიდრეობას ინარჩუნებენ, არამედ თანამედროვე ღირებულებებსაც ასახავენ. სწორედ ამიტომ, ეიფელის კოშკზე ქალ მეცნიერების სახელების დამატება ბევრისთვის მხოლოდ სიმბოლური გადაწყვეტილება არ არის — ეს კულტურული ბრენდინგის და თანამედროვე ტურისტული სტრატეგიის ნაწილიცაა.
წყარო:
https://euro-pulse.ru/news/na-ejfelevoj-bashne-teper-poyavyatsya-zhenskie-imena-ryadom-s-muzhskimi/
