დიდი ალბათობით უახლოეს საათებში, ან რამდენიმე დღეში ვენესუელის წინააღმდეგ აშშ სამხედრო ოპერაციას დაიწყებს.
“ყველა ავიაკომპანიის, პილოტის, ნარკოდილერისა და ადამიანებით მოვაჭრის საყურადღებოდ, გთხოვთ, ვენესუელის ზემოთ და მის გარშემო არსებული საჰაერო სივრცე ჩათვალოთ სრულად დახურულად”, - განაცხადა აშშ-ის პრეზიდენტმა დონალდ ტრამპმა.
„ნიუ იორკ თაიმსის“ ცნობით, აშშ-ის პრეზიდენტი დონალდ ტრამპი გასულ კვირას ვენესუელის პრეზიდენტს, ნიკოლას მადუროს ესაუბრა და მხარეებმა შეერთებულ შტატებში შესაძლო შეხვედრის საკითხი განიხილეს.
გამოცემა აღნიშნავს, რომ, სატელეფონო ზარის პარალელურად, დონალდ ტრამპი განაგრძობს სამხედრო რიტორიკას ვენესუელის მიმართ და ამავდროულად განიხილავს დიპლომატიურ გზასაც.
ტრამპის ადმინისტრაცია ნიკოლას მადუროს ვენესუელის არალეგიტიმურ ლიდერად მიიჩნევს, რომელიც სათავეში უდგას „კარტელ დე ლოს სოლესის“ ორგანიზაციურ დაჯგუფებას. აშშ, სექტემბრიდან მოყოლებული, იერიშებს ახორციელებს გემებზე, რომელთაც, სავარაუდოდ, ნარკოტიკული საშუალებები გადააქვთ.
აშშ ვენესუელელი ნარკოდილერების შესაჩერებლად ძალიან მალე დაიწყებს ხმელეთზე ზომების მიღებას, – ამის შესახებ აშშ-ის პრეზიდენტმა, დონალდ ტრამპმა განაცხადა.
აშშ-ის სამხედროებთან საუბრისას, ტრამპმა თქვა, რომ ქვეყნის ძალებმა „თითქმის შეაჩერეს“ ნარკოტიკებით საზღვაო ვაჭრობა.
„ბოლო კვირების განმავლობაში თქვენ მუშაობდით ვენესუელელი ნარკოდილერების შესაჩერებლად. რა თქმა უნდა, ისინი ზღვით აღარ შემოდიან, ალბათ შენიშნეთ. ეს თითქმის შევაჩერეთ. მათ შეჩერებას ხმელეთზეც დავიწყებთ. ხმელეთზე უფრო ადვილია, ეს ძალიან მალე დაიწყება. მათ ვაფრთხილებთ: შეწყვიტეთ ჩვენს ქვეყანაში შხამის გამოგზავნა“, – განაცხადა ტრამპმა.
