ეს ყველას გამოგვიცდია – ონლაინმაღაზიის ვებგვერდზე სასურველი ნივთის პოვნა, კალათაში დამატება, მაგრამ უცებ რაღაცაზე გადაგვაქვს ყურადღება და ნივთს კალათაში ვტოვებთ. ონლაინკალათების თითქმის 70% მიტოვებულია, რაც წარმოუდგენლად გავრცელებული ტენდენციაა.
იმის გასაგებად, თუ რატომ ხდება ეს ასე ხშირად, საჭიროა მომხმარებლის მთლიანი მოგზაურობის გაანალიზება. ვერ დაგპირდებით, რომ ყველა მომხმარებლის ნაბიჯს იდეალურად იწინასწარმეტყველებთ, მაგრამ შეგვიძლია გაგაცნოთ რუკა, რომელიც აკონტროლებს მნიშვნელოვან მომენტებს.
რა არის მომხმარებლის მოგზაურობის რუკა
მომხმარებლის მოგზაურობა VS მყიდველის მოგზაურობა
მყიდველის მოგზაურობა ზოგადი, უნივერსალური გზაა, რომელსაც ყველა მომხმარებელი გადის. მომხმარებლის კი უფრო კომპლექსურია. ის შედგება უნიკალური მომხმარებლის შეხების წერტილებისგან, რომლებსაც თქვენ ქმნით.
მოგზაურობის რუკა
მომხმარებლის მოგზაურობის რუკა წარმოადგენს მომხმარებლის გამოცდილების ვიზუალურ წარმოდგენას კომპანიასთან. ის ასევე იძლევა წარმოდგენას პოტენციური მომხმარებლების საჭიროებების შესახებ ამ მოგზაურობის ყველა ეტაპზე.
ამ რუკის შედგენით ნებისმიერი კომპანია გამოიყენებს ინფორმაციას მომხმარებლის გამოცდილების გასაუმჯობესებლად, კონვერსიების გასაზრდელად და მომხმარებლის შენარჩუნების გასაძლიერებლად.
რატომ არის მნიშვნელოვანი მომხმარებლის მოგზაურობის რუკა
მომხმარებლის მოგზაურობა ისეთი მარტივი არ არის, როგორც ერთი შეხედვით ჩანს. წარმოსადგენად მარტივია – შესთავაზეთ პროდუქტი → მომხმარებელი ყიდულობს. თუმცა, სანამ მომხმარებელი თქვენი პროდუქტის შესახებ გაიგებს, მან უნდა იცოდეს, რომ პრობლემა აქვს და რომ მისი მოგვარებაა საჭირო. მოგზაურობის განმავლობაში ისინი სხვადასხვა შეხების წერტილს წააწყდებიან. შესაძლოა, ნახონ კონკურენტის რეკლამა, წაიკითხონ მიმოხილვა ან ცადონ დემოვერსია. თითოეული ეს ურთიერთქმედება განსაზღვრავს, თუ როგორ აღიქვამენ ისინი თქვენს ბრენდს.
რა მონაცემებია საჭირო მომხმარებლის მოგზაურობის რუკის შესაქმნელად
პირველ რიგში, საჭიროა რეალური მონაცემები და არა ვარაუდები. იმის გაგება, თუ ვინაა თქვენი მომხმარებელი, ფუნდამენტურია.
დაგჭირდებათ: ასაკი, სქესი, მდებარეობა, შემოსავალი, პროფესია, ცხოვრების წესი, შესყიდვის სიხშირე და სტატუსი, ანუ ახალი მომხმარებელია, ლოიალური თუ რისკის ქვეშ მყოფი.
ერთ-ერთი კარგი საშუალება მომხმარებლისგან ინფორმაციის მისაღებად გამოკითხვები და ინტერვიუებია. განსაკუთრებით მნიშვნელოვანია შესყიდვის შემდგომი გამოკითხვების გამოყენება იმის გასაგებად, თუ რა მოეწონათ ან რა უჭირდათ მათ შეძენის პროცესში.
სასარგებლო მონაცემები:
- ქცევა ვებში: მათ მიერ ნანახი გვერდები, გვერდების თანმიმდევრობა, რომლებზეც აწკაპუნებენ, გადასვლის მაჩვენებლები და მიტოვებული კალათები ბევრ რამეს ამბობს თქვენს მომხმარებელზე
- ქცევა ელფოსტაზე: გახსნისა და დაწკაპუნების მაჩვენებლები და სხვა ტიპის ჩართულობა
- ხსენებები სოციალურ მედიაში და მიმოხილვები – საჯარო კომენტარები გეხმარებათ იმის ამოცნობაში, რით არის კმაყოფილი მომხმარებელი და პირიქით, რა არ მოსწონსო
- პერაციული მონაცემები – ეს არის შიდა მონაცემები, როგორიცაა მიწოდების შეფერხებები ან დრო, რომელიც მომხმარებელთა მხარდაჭერაზე დაიხარჯა
მომხმარებლის მოგზაურობის რუკის თანმიმდევრობა
- დაიწყეთ მომხმარებლის მოგზაურობის რუკის შაბლონით
- დაისახეთ რუკისთვის მკაფიო მიზნები
- შეადგინეთ თქვენი პერსონების პროფილი და განსაზღვრეთ მათი მიზნები
- გამოყავით თქვენი სამიზნე მომხმარებლის პერსონები
- ჩამოთვალეთ ყველა შეხების წერტილი
- განსაზღვრეთ თქვენს ხელთ არსებული და საჭირო რესურსები
- თავად გაიარეთ მომხმარებლის მოგზაურობა
- გააანალიზეთ თქვენი შედეგები
- დროთა განმავლობაში განაახლეთ თქვენი რუკა
გარდა ამისა, თქვენს რუკაზე უნდა იყოს წარმოდგენილი: შეძენის პროცესი, ემოციები, მომხმარებლის ქმედებები, მომხმარებლის კვლევა და გადაწყვეტილებები.
მომხმარებლის მოგზაურობის რუკები უბრალოდ დიაგრამები არ არის. ისინი თანაგრძნობისა და სტრატეგიის განვითარების ინსტრუმენტებია. ეს გაიძულებთ, რომ თქვენი მომხმარებლის ადგილას წარმოიდგინოთ თავი და თქვენს ბიზნესს მათი პერსპექტივიდან შეხედოთ.
