ემიგრანტი, რომელსაც საზღვარგარეთ წასვლა ძმის მკურნალობის გამო დასჭირდა, სამთავრობო მედიის მიერ გავრელებულ ინფორმაციას "სამარცხვინო ტყუილს" უწოდებს. საუბარია ექსპერტების განცხადებებზე, რომლებიც ამტკიცებენ, რომ დიუშენით დაავადებული ბავშვების დახმარებას სახელმწიფო "ისედაც უზრუნველყოფს".
ქალი ყვება, რომ ოჯახს სასიცოცხლოდ მნიშვნელოვანი აპარატურისა და ყოველდღიური სამედიცინო საჭიროებების დაფინანსებისთვის წლების განმავლობაში ბრძოლა თავად უწევდა. მისი თქმით, მიუხედავად არაერთი მიმართვისა, ადგილობრივმა ხელისუფლებამ და უწყებებმა საჭირო დახმარებაზე უარი უთხრეს.
მისი თქმით, სწორედ ამ რეალობამ აიძულა ოჯახი, საქართველო დაეტოვებინა და მკურნალობის გაგრძელების იმედით სტრასბურგში წასულიყო.
"2 წლის წინ დასჭირდა ჟანგბადი აპარატურა და სამწუხაროდ, არავინ დააფინანსა. ეს არის დოკუმენტები, რომელიც მერიიდან მივიღეთ და უარს ამბობენ ამ ჟანგბადის აპარატის დაფინანსებაზე. ეს არის გამგეობა, ასაევე უარი განაცხადეს და ბოლოს, ჯანდაცვამ, ხელმეორედ შეტანილი განცხადების ფონზე დააფინანსა მხოლოდ და მხოლოდ ნაწილი. თანხა ჯდებოდა 22 ათასი ლარი და ნახევარი თანხით მეგობრები, ახლობლები და ნათესავები დაგვეხმარნენ, რომ შეგვეგროვებინა. მაგრამ, აქ ხაზი უნდა გავუსვათ იმას, რომ ამ ბავშვების საჭიროება არ არის მხოლოდ ჟანგბადის აპარატის ყიდვა და ამისთ დასრულებული პრობლემა. ამავდროულად, ამათ სჭირდებათ ყოველდღიურად სანაციის გაკეთება, რომელსაც სჭირდება საემდიცინო ჩხირები და თითო ჩხირი ღირს 1 ლარი, ამას სჭირდება ასევე ხელთათმანები, რომელიც 1.20 ღირს და დღეში შეიძლება სანაციის გაკეთება დასჭირდეს 20-ჯერ ან 15-ჯერ. წარმოიდგინეთ, ეს არის, მინიმუმ 40-45 ლარი. ასევე სჭირდებათ სტომის შეცვლა ყოველთვიურად და ექიმი რომ სახლში მოვიდეს, ეს არის 200 ლარი და არავინ გიფინანსებს. თვითონ სტომა ღირს 65 ლარი და ასევე არავინ გიფინანსებს ამას. ახლა მე მინდა, ვკითხო მთავრობას, თუ ეს ყველაფერი ფინანსდება, სტრასბურგში გამოვიქეცით ზუსტად ამის გამო, რომ არაფერი დაფინანსდა. ჩამოსვლიდან 4 თვეში დედა გარდაგვეცვალა, რომლის ბოლო გზაზე გაცილება ვერ სევძელით ვერცერთმა დამ, რადგან აქ დავრჩით, რომ საბასთვის ეს გზა გაგვეგრძელებინა, რაც საქართველოში არ მოხერხდა და მე მაინტერესებს, თუ ყველაფერი ფინანსდება, მე მაშინ რატომ ვარ დღეს სტრასბურგში, დედის საფლავი რატომ არ ვიცი და რატომ გამოვექეცი ამ ყველაფერს? ეს არის ძალიან დიდი ტყუილი და ძალიან დიდი სირცხვილი, რასაც ესენი კადრულობენ," - ამბობს მოქალაქე.
შეგახსენებთ, რომ „დაიცავი ილიაუნის“ საქველმოქმედო ლაივ-მარათონში, დიუშენის კუნთოვანი დისტროფიის მქონე ბავშვების მხარდასაჭერად, უკვე 1 500 000 ლარზე მეტი შეგროვდა. ინიციატივას ათეულობით კომპანია, გამომცემლობა, უნივერსიტეტი და კლინიკა შეუერთდა.
ამ ფონზე, დიუშენით დაავადებული ბავშვების მშობლები სამთავრობო მედიების მიერ გავრცელებულ ინფორმაციას პასუხობენ და მას "პროპაგანდას" უწოდებენ. საუბარია სამთავრობო ექსპერტებზე, რომლებიც ამტკიცებენ, რომ დიუშენის სინდრომის მქონე ბავშვებისთვის საჭირო ინვენტარებს სახელმწიფო "ისედაც აფინანსებდა". მშობლების შეფასებით, ახლა მიმდინარეობს კამპანია, რომლის მიზანიც საზოგადოების დარწმუნებაა, თითქოს დიუშენის სინდრომის მქონე ბავშვებს დამატებითი დახმარება და ძვირადღირებული მკურნალობა რეალურად არ სჭირდებათ.
