2026 წლის ბიუჯეტის საბოლოო ვერსიაში, რომელიც პარლამენტში განსახილველადაა შეტანილი, ანაკლიის ღრმაწყლოვანი პორტის მშენებლობისთვის გათვალისწინებული თანხა 100 მილიონი ლარით არის შემცირებული. ამ მიზნისთვის ბიუჯეტის პირველ და მეორე ვარიანტებში 150 მილიონი ლარის გამოყოფა მოიაზრებოდა, საბოლოო დოკუმენტში კი ვკითხულობთ, რომ ანაკლიის პორტის მშენებლობაზე მომავალ წელს 50 მილიონი ლარი დაიხარჯება.
"ანაკლიის ღრმაწყლოვანი პორტისთვის საჭირო წყლის ინფრასტრუქტურის მშენებლობისთვის გათვალისწინებული ასიგნება გასულ და მიმდინარე წელს გამოყოფილი სახსრებისა და 2026 წელს არსებული საჭიროების გათვალისწინებით, ბიუჯეტის პროექტის პირველად ვარიანტთან შედარებით მცირდება 100,0 მლნ ლარით და განისაზღვრება 50,0 მლნ ლარის ოდენობით",- ვკითხულობთ კანონის პროექტის განმარტებით ბარათში, რომელიც პარლამენტს ცორა ხნის წინ წარედგინა.
მომდევნო წლის ბიუჯეტში ასევე გათვალსიწინებულია 45 მილიონი ლარი პორტამდე მისასვლელი 18-კილომეტრიანი გზის მშენებლობისთვის. ეს არ შეცვლილა 2026 წლის ბიუჯეტის პროექტის პირველად ვერსიასთან მიმართებით.
ჯამურად, მომავალ წელს როგორც უშუალოდ პორტის, ისე მასთან მისასვლელი გზის მშენებლობაზე 95 მილიონი ლარი დაიხარჯება.
2027 წელს გზის მშენებლობაზე 125 მილიონი ლარია გათვალისწინებული, ხოლო პორტის ინფრასტრუქტურის მოწყობაზე ასევე 125 მილიონი ლარი.
