2025 წელს შეიცვალა არა დოლარის სარგებლიანობა, არამედ ბაზრის მზაობა, ნაგულისხმევად ფლობდეს დაუჰეჯავ დოლარის პოზიციებს, - - ამის შესახებ ინფორმაციას TBC Capital პუბლიკაციაში „ფინანსური ბაზრების გლობალურ მოლოდინებში“ აქვეყნებს.
პუბლიკაციის ავტორები აღნიშნავენ, რომ ინვესტორები სულ უფრო მეტად ანაწილებენ პორტფელებს სხვადასხვა ვალუტაზე და ჰეჯავენ დოლარის რისკს, მაშინაც კი, როცა კვლავ ამერიკულ აქტივებში ახორციელებენ ინვესტიციას— განაწილების ეს ცვლილება ასახავს და ამავდროულად აძლიერებს დოლარის უფრო ზომიერ დინამიკას მაღალი საწყისი წერტილიდან.
„მიუხედავად მისი დომინირებისა ვაჭრობაში, FX ბრუნვასა და რეზერვებში, ინვესტორთა გაურკვევლობა 2022-ში გაჩნდა, როცა დასავლურმა სანქციებმა რუსეთის რეზერვების მნიშვნელოვანი ნაწილი გაყინა. ამან ცხადყო, რომ დოლარის აქტივებზე წვდომა პოლიტიკურ გადაწყვეტილებებზეა დამოკიდებული. რისკების ზრდამ შეარყია მისი, როგორც სარეზერვო ვალუტის, ხელშეუხებლობის სტატუსი. ბოლო დროს ბაზრები შეარყია მოვლენებმა, რომლებიც სცდება სტანდარტულ„risk-off“ დინამიკას.
2025 წლის დასაწყისიდან კავშირების საგანგაშო რღვევას ვხედავთ: აშშ-ის სახაზინო ობლიგაციების შემოსავლიანობა დოლარის შესუსტების ფონზეც კი გაიზარდა. ეს ქცევა უფრო სტრესული განვითარებადი ბაზრებისთვისაა დამახასიათებელი, ვიდრე ჩამოყალიბებული სარეზერვო ვალუტისთვის. ეს დივერსიფიკაცია მიანიშნებს აშშ-ის აქტივებზე მზარდ რისკ- პრემიაზე, რადგან ინვესტორები ხელახლა აფასებენ დოლარის სტრუქტურულ უსაფრთხოებას, არსებულ, დიდი ხნის განმავლობაში შეუვალად მიჩნეულ წარმოდგენებს. ამ ცვლილების საფუძველი ამერიკის ფისკალურ ტრაექტორიასთან დაკავშირებული მზარდი შეშფოთებაა. გრძელვადიანი ვალის მდგრადობის გაუარესება და საგადასახადო ცვლილებები ზრდის საკრედიტო რისკს და იმის ალბათობას, რომ Fed-ის დამოუკიდებლობა დე ფაქტო შეიზღუდება ხაზინის დაფინანსების საჭიროებებით. „განთავისუფლების დღის“ ტარიფების ირგვლივ არსებულმა პოლიტიკურმა გაურკვევლობამ გაზარდა მერყეობა და შეასუსტა დოლარის მიმართ განწყობა, რამაც დაარღვია მიწოდების ჯაჭვები, გააფართოვა აშშ-ის ზრდისა და ინფლაციის პროგნოზების დიაპაზონი და გაზარდა პოლიტიკის უეცარი ცვლილებების რისკი. ასეთ გარემოში ინვესტორებს გაცილებით ძლიერი სტიმული უჩნდებათ რომ მიმართონ დივერსიფიკაციას.
ჩვენ არ ველით დოლარის სარეზერვო სტატუსის ახლო მომავალში კოლაფსს, თუმცა ველით, რომ მონეტარული სისტემა უფრო ფრაგმენტული გახდება– ასეთ გარემოში დოლარი კვლავ დარჩება დომინანტურ ვალუტად, მაგრამ უკვე„მეზობლობას“ გაუწევს უფრო ფართო სპექტრის რეგიონულ და ფუნქციურ სარეზერვო აქტივებს. ასეთ სისტემაში დოლარის კურსის ნელი, მაგრამ მდგრადი შემცირების მოლოდინი გვაქვს, რომელსაც თან გაჰყვება მერყეობის პერიოდული ეპიზოდები და ბაზრის ნდობის დროებითი რყევები. დოლარი არ მოექცევა არარელევანტურობის სპირალში, მაგრამ მისი უდავო უპირატესობის ეპოქა დასრულებულია“, - წერია პუბლიკაციაში.
