2026 წლის ბიუჯეტის პროექტის მიხედვით გაისად ასაკობრივი პენსიები იზრდება. ზრდა 2026 წლის იანვრიდან მოხდება.
მთავარი ფინანსური დოკუმენტის კორექტირებული ვერსიაში, რომელიც საქართველოს მთავრობამ პარლამენტს წარუდგინა, წერია, რომ მომავალი წლიდან 70 წლის და მეტი ასაკის პენსიონერთა პენსია იზრდება 45 ლარით და განისაზღვრება 495 ლარის ოდენობით. მაღალმთიან დასახლებებშიამავე კატეგორიის პენსიონერთა პენსია თითქმის 594 ლარს გაუტოლდება;
70 წლამდე პირთა პენსია იზრდება 20 ლარით და განისაზღვრება 370 ლარის ოდენობით, ხოლო მაღალმთიან დასახლებებში 444 ლარი იქნება.
დღეს საქართველოში 70 წლამდე პირთა პენსია 350 ლარს შეადგენს, მაღალმთიან დასახლებებში ამავე ასაკობრივ ჯგუფის პენსიონერები 420 ლარს იღებენ. 70 წლის და მეტი ასაკის პენსიონერთა პენსია 450 ლარს შეადგენს, ხოლო მაღალმთიან დასახლებებში ამავე კატეგორიის პენსიონერთა პენსია თითქმის 540 ლარს შეადგენს.
მომავალ წელს მკვეთრად გამოხატული და 18 წლამდე შშმ პირების სოციალური გასაცემლები 45 ლარით, ხოლო დანარჩენი კატეგორიის შშმ პირთა გასაცემელი 20 ლარით გაიზრდება.
2026 წელს ჯანდაცვისა და სოციალური დაცვის პროგრამების დასაფინანსებლად სამინისტროს დაფინანსება გაზრდილია 840 მლნ ლარზე მეტით.
