​„რთველი 2020“- კახეთში გადამწყვეტ ფაზაში შევიდა. უკვე გადამუშავებულია 90 ათასზე მეტი ტონა ყურძენი. მოსავლის საპროგნოზო რაოდენობა კი, 300 ათასი ტონაა.

მიმდინარე წელს, პანდემიის გამო მევენახეობა-მეღვინეობის დარგი მნიშვნელოვნად დაზარალდა. მათ მხარდასაჭერად, მთავრობა „რქაწითელისა“ და „კახური მწვანის“ ჯიშის ყურძნის სუბსიდირებას ახორციელებს. კილოგრამზე 30 თეთრის სუბსიდიას მიიღებს ღვინის კომპანია, რომელიც შეისყიდის და გადაამუშავებს კახეთის რეგიონში მოწეულ, არანაკლებ 1 000 ტონა „რქაწითელს“ ან „კახურ მწვანეს“ და ფერმერს 1 კილოგრამში არანაკლებ 80 თეთრს გადაუხდის.

„2020 წელი საკმაოდ მოსავლიანია. შესაბამისად, ჭარბია ყურძნის წარმოებაც და არა მარტო საქართველოში. სახელმწიფომ სწორი გადაწყვეტილება მიიღო, როდესაც თეთრი ყურძნის შესყიდვის სუბსიდირებაზე განაცხადა. ჩვენ ვმონაწილეობთ ამ პროგრამაში, ვგეგმავთ 2000 ტონა ყურძნის შეძენას. სახელმწიფო ფასის ნაწილის სუბსიდირებას მოახდენს. საბოლოო ჯამში, ეს მომგებიანია როგორც ღვინის კომპანიისთვის, ასევე ყურძნის ჩამბარებლისთვის“,-აცხადებს „თელავის ღვინის მარნის“ დამფუძნებელი ზურაბ რამაზაშვილი. ამ ეტაპზე, რთველის საკოორდინაციო შტაბში დარეგისტრირებულია ღვინის მწარმოებელი 260 კომპანია. ყურძნის გადამუშავების პროცესში უკვე ჩართულია ღვინის 80 საწარმო.

 imedinews.ge