COVID-19-ის პანდემიის შედეგად შექმნილმა კრიზისულმა ვითარებამ ღვინის სექტორი მნიშვნელოვნად დააზარალა. შემცირდა ექსპორტი, ტურისტული სეზონის ჩავარდნამ კი მინიმუმამდე დაიყვანა ღვინის გაყიდვები შიდა ბაზარზე. იმისთვის, რომ პანდემიის გამო გამოწვეული ეკონომიკური კრიზისი რთველზე არ აისახოს, საქართველოს ხელისუფლება მეღვინეობის დარგზე ანტიკრიზისული გეგმის ფარგლებში იზრუნებს. სოფლის მეურნეობის სამინისტრო, სხვა უწყებებთან ერთად, გააგრძელებს ინტენსიურ მუშაობას, რათა ყურძნის ჩაბარების პროცესში არ შეიქმნას პრობლემები.

როგორც გადაცემაში „ბიზნესი იმედზე“ „თელავის ღვინის მარანი“-ს დამფუძნებელი ზურაბ რამაზაშვილი აცხადებს სახელმწიფო სუბსიდირება მნიშვნელოვანი კომპონენტია. მეღვინეები ექსპორტის შემცირების გარდა ადგილობრივ ბაზარზე მოთხოვნის მკვეთრად ვარდნასაც უჩივიან. რთველის პერიოდში კვლავ ამოქმედდება სახელმწიფო ქარხანა, რომელიც გაუსაღებელ პროდუქციას ჩაიბარებს.

„ამ თვალსაზრისით სახელმწიფო სუბსიდირება ძალიან მნიშვნელოვანი იქნება. პირველ რიგში, იგი დაეხმარება ფერმერს, თავისი შრომის საზღაური მიიღოს და მეორეს მხრივ, კომპანიები შეძლებენ შედარებით იაფი ნედლეულის მიღებას. აქედან გამომდინარე, იაფი ღვინის წარმოება, ამ კრიზისის ფონზე უზრუნველყოფს მომავალ გაყიდვებს“, - აცხადებს ზურაბ რამაზაშვილი.

მევენახეები წელს ყურძნის კარგ მოსავალს ელოდებიან, როგორც რაოდენობრივად ისე ხარისხობრივად. თუმცა, პრობლემა რეალიზაციაა. გადაცემაში „ბიზნესი იმედზე“ მევანახეთემურ ყურაშვილი აღნიშნავს, რომ ამ გამოწვევის დასაძლევად აუცილებელია სახელმწიფოს მხრიდან დროული და სწორი ნაბიჯების გადადგმა. კახელი ფერმერების ნაწილი ფიქრობს, რომ ყურძნის ფასი დანახარჯების შესაბამისი უნდა იყოს. წინააღმდეგ შემთხვევაში, ისინი მოსავლის ხარჯებსაც კი ვერ აინაზღაურებენ.

სტატისტიკის ეროვნული სამსახურის მონაცემებით 2020 წლის იანვარ-მაისში 2019 წლის იგივე პერიოდთან შედარებით, მეღვინეებმა ექსპორტზე თითქმის 3 მლნ ლიტრით ნაკლები ღვინო გაიტანეს. გამომდინარე იქიდან, რომ ქართული ღვინისთვის ყველაზე მსხვილი საექსპორტო ბაზარი რუსეთია, შემცირების დიდი მაჩვენებელიც სწორედ ამ ბაზარზე - 2 მლნ ლიტრი დაფიქსირდა. ყურძნის კრეფა ტრადიციულად, დედოფლისწყაროს მუნიციპალიტეტიდან, დაახლოებით 20 აგვისტოდან დაიწყება. კახეთის დანარჩენი მუნიციპალიტეტები რთველის პროცესში ეტაპობრივად ჩაერთვებიან.

Imedinews