ყურძნის ხარისხის კონტროლის გამკაცრების შესახებ მიღებულ გადაწყვეტილებას დადებითად აფასებენ კომპანია "თბილღვინოში". თუმცა, როგორც კომპანიის დამფუძნებელი აცხადებს, საქართველოდან ხარისხიანი პროდუქტის ექსპორტზე გატანისთვის ეს ნაბიჯი საკმარისი არ არის.

ზურაბ მარგველაშვილის განმარტებით, საჭიროა ღვინის ხარისხიანობის კონტროლი საქართველოს საბაჟო სივრცეში განხორციელდეს, რაც კომპანიებს შეუქმნის მოტივაციას, შეარჩიონ ისეთი ყურძენი, რომელიც ექსპორტის საბოლოო წერტილში მათ პრობლემას არ შეუქმნის.

„თუკი სახელმწიფო შეძლებს ყურძნის ხარისხის შაქრიანობის მიხედვით მოსავლის ზედა ზღვარის გაკონტოლებას, რა თქმა უნდა, ეს მისასალმებელია. თუმცა ეს აშკარად არ არის საკმარისი იმისთვის, რომ საქართველოდან არ გადიოდეს ექსპორტზე უკანონოდ და უხარისხოდ ნაწარმოები პროდუქცია. სანამ ბოლო წერტილში, საიდანაც ღვინომ საქართველოს საბაჟო სივრცე უნდა დატოვოს, არ იქნება აპრობირებული, საერთაშორისო დონის კონტროლი, მანამდე ეს ნაბიჯები იქნება მხოლოდ ნაწილობრივი გადაგმული ნაბიჯი ხარისხის კონტროლისკენ,“ - ამბობს ზურაბ მარგველაშვილი.

შეგახსენებთ, რომ გარემოს დაცვისა და სოფლის მეურნეობის სამინისტროს გადაწყვეტილებით ქართული ღვინის ხარისხის გაუმჯობესების მიზნით, რთველი 2021-ის ფარგლებში, ყურძნის ხარისხის კონტროლი გამკაცრდება.

ჩასაბარებელი ყურძნის შაქრიანობა, რომელიც შესაბამისი ნორმატიული დოკუმენტაციებითაა დადგენილი, განსაზღვრავს ყურძნის ხარისხს, რაც შემდგომ მის საბაზრო ღირებულებაზეც აისახება. ამასთან, კონტროლი განხორციელდება ადგილწარმოშობის ჯიშების სპეციფიკაციებით განსაზღვრულ მოსავლიანობის ლიმიტზე.

წყარო: business-partner.ge