თიბისი კაპიტალი ყოველკვირეულ კვლევაში ეკონომიკის აღდგენის მაჩვენებლებს პოზიტიურად აფასებს. განსაკუთრებულ ყურადღებას კი ექსპორტსა და ტურიზმის ზრდაზე ამახვილებს. კვლევაში მოყვანილი ცალსახა დადებითი ფაქტორების მიუხედავად, გაზრდილი უმუშევრობისა და ინფლაციის ფონზე მკვეთრადაა მომატებული სოციალურ დახმარებაზე დამოკიდებულთა რაოდენობაც.


ივლისში ექსპორტი გასული წლის ანალოგიურ პერიოდთან შედარებით 42%-ით, 2019 წლის ივლისთან შედარებით კი 21%-ით გაიზარდა. განსაკუთრებული ზრდა ფეროშენადნობების, სპილენძის მადნებისა და მსუბუქი ავტომობილების მიმართულებით დაფიქსირდა. მათ გარდა იანვარ–ივლისში ასევე მკვეთრად გაიზარდა ღვინის, სპირტიანი სასმელების, მინერალური წყლებისა და თხილის ექსპორტიც.


ექსპორტის ნახევარზე მეტი ოთხ ქვეყანაში: ჩინეთში, რუსეთში, აზერბაიჯანსა და თურქეთში გადის, მათგან პირველ ადგილს 16.3%-იანი წილით ჩინეთი იკავებს.


ივლისში ტურისტების რაოდენობა 474%-ით გაიზარდა. თიბისი კაპიტალიც ცნობით, ბევრად უფრო მაღალი – 1602%-იანი ზრდა ტურიზმიდან მიღებული შემოსავლების კუთხით დაფიქსირდა.


მატება ფიქსირდება საზღვარგარეთიდან ფულად გზავნილებზე, რომელზეც თბილისიდან გავლენის მოხდენა შეუძლებელია. ივლისში ფულადი გზავნილების მოცულობა 10%-ით, $208 მლნ-მდე, იანვარ-ივლისში კი 35%-ით $1.291 მლრდ-მდე გაიზარდა.


პოზიტიურთან ერთად ბოლო პერიოდში რამდენიმე ნეგატიური ინფორმაციაც გავრცელდა. უმუშევრობა მეორე კვარტალში 22.1%-მდე გაიზარდა, რაც გასული წლის ანალოგიურ პერიოდთან შედარებით 3.8%-ით, ხოლო პანდემიამდელ პერიოდთან შედარებით 4.8%-ით მეტია.


ინფლაციის განაკვეთმა 11.9%-ს მიაღწია, გამკაცრებული მონეტარული პოლიტიკის გამო 124 000–ზე მეტ პირს ლარში აღებული სესხი გაუძვირდა.


თუ გასული წლის ივლისში სოციალურ დახმარებას 487 ათასი ადამიანი იღებდა, ახლა ეს რიცხვი 27.5%-ით 622 ათასამდეა გაზრდილი, რაც იმას ნიშნავს, რომ საქართველოს ყოველი მეექვსე მოქალაქე სოციალურ დახმარებაზეა დამოკიდებული.


2020 წლის სექტემბერში პარლამენტს განსახილველად გადაეგზავნა ბიუჯეტი, რომელიც ეკონომიკის 5%-იან ზრდაზე იყო გათვლილი, ეპიდსიტუაციის გაუარესებისა და სავალუტო ფონდის რეკომენდაციის შემდეგ, ზრდის ტემპი 3.5%-მდე შემცირდა, მოგვიანებით სავალუტო ფონდმა პროგნოზი დამატებით 3.5%-მდე შეამცირა, თუმცა მეორე კვარტალში დაფიქსირებული ორნიშნა მატების ფონზე ბიუჯეტის ხარჯვითი ნაწილი 1.1 მლრდ ლარით გაიზარდა და ეკონომიკური ზრდის პროგნოზი კი 7.7%-ით განისაზღვრა.