„დაზღვევის ხელშეკრულებების გაუქმებები ამ ეტაპზე არ გვიფიქსირდება. გვაქვს რამდენიმე მოთხოვნა თანხის გადახდის გადავადებასთან დაკავშირებით, რომელსაც ვითვალისწინებთ ქვეყანაში და მსოფლიოში არსებული მდგომარეობის გამო“ - სადაზღვევო კომპანია Imedi L-ი „კომერსანტთან“ დაზღვეული მომხმარებლების მხრიდან აქტივობასა და კომპანიის ფორსმაჟორულ პოლიტიკაზე საუბრობს, რომლის აქტუალობა კორონავირუსის გავრცელებამ და მომხმარებლების მხრიდან თანხების დაზოგვის მოტივაციამ გამოიწვია.
მათი ინფორმაციით, დაზღვევები მათ კომპანიაში ამ ეტაპზე არ უქმდება, თუმცა გადავადების მოთხოვნების დაკმაყოფილება უპრობლემოდ ხდება.
„სხვა გამოსავალი არ გვაქვს, ვცდილობთ რომ მოვერგოთ
სიტუაციას და მივყვებით დინებას. ამ ეტაპზე არგუმენტირებულ მოლოდინებზე საუბარი ცოტათი
ნაადრევია, ცოტა დროა გასული ბაზრისთვის ვირუსის გავრცელებიდან. შეიძლება დროთა გამავლობაში
მდგომარეობა ისე შეიცვალოს, რომ ეს პესიმისტური მოლოდინები, რაც ჩვენს ფიზიკურ
პირებს შეიძლება აქვთ, არ გამართლდეს“ - აცხადებს Imedi L-ის კომუნიკაციების მენეჯერი სალომე მახარაძე.
როგორც სადაზღვევო კომპანია ალდაგის გენერალურმა დირექტორმა გიორგი ბარათაშვილმა აღნიშნა კრიზისმა არც სადაზღვევო ბიზნესს აუარა გვერდი, თუმცა სიტუაციის მორგებასთან ერთად კომპანია ახალი პროდუქტების დანერგვაზეც ფიქრობს.
„კრიზისი, რასაკვირველია, მთლიანად ეკონომიკურ აქტივობაზე აისახება და არც სადაზღვევო ბიზნესია გამონაკლისი. მიუხედავად ამისა, ვცდილობთ მაქსიმალურად მოვერგოთ ახალ რეალობას და ძალიან სწრაფი ნაბიჯების შედეგად, ჩვენი ყველა სერვისი დღეს მომხმარებლისთვის ხელმისაწვდომია დისტანციურად, რაც იმას ნიშნავს რომ მუშაობას ვაგრძელებთ იგივე და უფრო მეტი ძალებით. გარდა ამისა, ვფიქრობთ ახალ პროდუქტებზე, რომ ვიყოთ ადექვატურები დღევანდელ მოცემულობაში. ვფიქრობთ, რომ კრიზისი უსასრულოდ არ გაგრძელდება და თუ ბიზნესი სწორად მიიღებს ამ გამოწვევას, ნელ-ნელა შეძლებს დაიბრუნოს პოზიციები.“ - განაცხადა გიორგი ბარათაშვილმა.
როგორც ცნობილია, სადაზღვევო ასოციაციის ხელმძღვანელმა დევი ხეჩინაშვილმა რამდენიმე დღის წინ განაცხადა, რომ მომხმარებლები სადაზღვევო ხელშეკრულებების გაუქმებას ითხოვენ, ტენდენცია მზარდია და ორ-სამ კვირაში შესაძლოა, დაზღვეულთა რაოდენობა კრიტიკულ ნიშნულამდე შემცირდეს.
კორონავირუსმა უკვე საკმაოდ დააზარალა გარკვეული სექტორები.მათ შორისაა, ტურიზმი, სასტუმროს ბიზნესი და ასე შემდეგ. ეკონომიკური ზარალი არა თავად ვირუსის, არამედ უფრო მისი გავრცელების პრევენციული ღონისძიებებიდან მომდინარეობს. თუმცა იგი გავლენას ახდენს მომხმარებლების და სახელმწიფოების გადაწყვეტილებებზე. ადამიანები ცდილობენ თავი აარიდონ მოგზაურობას, ვაჭრობას, რაც საბოლოო ჯამში მოთხოვნის კლებას იწვევს. ვირუსის გავრცელების არეალის ზრდის პარალელურად მოთხოვნისა და მიწოდების შეზღუდვა შესაძლოა მნიშვნელოვან პრობლემად იქცეს მსოფლიო ეკონომიკური ზრდისთვის.
მარიამ მორგოშია