ყაზბეგის რაიონ სოფელ ჯუთაში მდებარე ბანაკი „ზეთა“ 7 ივლისიდან მხოლოდ კაფეს გახსნის, რაც შეეხება კოტეჯებს,ობიექტები მოგვიანებით, სპეციალური კომისიის დათვალიერების შემდეგ გაიხსნება.
„საკემპინგე“ სივრცის ბედი კი ჯერჯერობით გაურკვეველია, ამის შესახებ „კომერსანტთან“ ბანაკი „ზეთას“ მფლობელმა ანანო არაბულმა ისაუბრა. მისი ინფორმაციით, ამ ეტაპზე კოტეჯების მომზადების და არსებულ სიტუაციასთან მორგების პროცესი მიმდინარეობს.
„გასულ წელს ვაქირავებდით საერთო ოთახებს ,პრობლემა არ იყო, რომ რვა ან ექვსი კაცი განთავსებულიყო ნომერში და ეხლა ყველაფერი უნდა გადავაკეთოთ და მოვარგოთ არსებულ სიტუაციას, დისტანცია უნდა იყოს ორი მეტრი და ამიტომ ადგილები ძალიან შემცირდა. ასე რომ ფასს ფაქტობრივად ნაკლებს ვადებთ, იმასთან შედარებით რაც მთლიანი ოთახი წინა წელს ჯდებოდა“
როგორც ანანო არაბული განმარტავს,ტურები ძირითადად უცხოელ ტურისტებზე მოდიოდა, პანდემიამდე არსებული ჯავშნები კი ნაწილობრივ გაუქმდა. დარჩა მხოლოდ დაინტერესება უნგრეთიდან, პოლონეთიდან და დანიიდან, თუმცა, გაუქმდება თუ არა ეს ჯავშნები დამოკიდებულია ეპიდ სიტუაციასა და ფრენების აღდგენაზე.რაც შეეხება ადგილობრივ ტურისტებს და საფასო პოლიტიკას, გამომდინარე სიტუაციიდან, ბანაკის მფლობელი აცხადებს, რომ შესაძლოა წელს ფასები დაკორექტირდეს.
„ფასი ძალიან არ მინდა რომ გავზარდოთ, პირიქით, ვფიქრობთ, რომ შევამციროთ იმიტომ, არსებული სიტუაციიდან გამომდინარე, გვინდა ჩვენ ქვეყანას და ხალხს მოვარგოთ. ისედაც ყველას ძალიან გაუჭირდა ამ პერიოდში. თუმცა,ვფიქრობ, რომ ძალიან რთული იქნება ასე მუშაობა, იმიტომ რომ ხარჯი ფაქტობრივად დიდია, ძალიან გაძვირდა ყველაფერი.“-აცხადებს არაბული.
ანანო არაბულმა „კომერსანტთან“ მთავრობის მიერ დაწესებულ რეკომენდაციებზეც ისაუბრა და აღნიშნა, რომ მოთხოვნები აბსურდულია.
„ვერაფერს გვეუბნებიან, მაგალითად, კარვებთან დაკავშირებით როდესაც ვუკავშირდებით არავის პასუხი არ აქვს, კემპინგის ბედი ფაქტობრივად გაურკვეველია, არ იციან რა უნდა გვიპასუხონ, გვეუბნებიან კომისია, რომ ამოვა ადგილზე ვკითხოთ. ჩვენ მაინც ვემზადებით, წინააღმდეგ შემთხვევაში უნდა დავიკეტოთ“-აცხადებს არაბული.
თაკო კვაჭანტირაძე
ზეთა კემპინგი
