2020 წლის აგვისტოდან ზაზა მამულაშვილი Frontera Resources Georgia-ს დირექტორისა და დირექტორთა საბჭოს პოზიციაზე აღარ იმყოფება. ამასთან დაკავშირებით კი, რამდენიმე სასამართლო პროცესიც გაიმართა და ჯერ კიდევ მიმდინარეობს. ინფორმაციას, კომპანიის აქციონერები ავრცელებენ. როგორც ცნობილია, მათ სათავო ოფისიდან მიიღეს ოფიციალური მეილი, რომლის საფუძველზეც ირკვევა, რომ ამჟამად მენეჯმენტთან დაკავშირებული რესტრუქტურიზაცია მიმდინარეობს. აქციონერები კომერსანტთან განმარტავენ, რომ მათთვის სრული ინფორმაციის მიღება ამ ეტაპზე ძალიან რთულია და ფაქტობრივად პროცესები ჩრდილში მიმდინარეობს, რის გამოც თითოეული მათგანი შეშფოთებულია და არ იციან თუ რა ელით მათ ინვესტიციებს.

„აქციონერები ძალიან  აღელვებულები არიან, რადგან არ ვიცით ვკარგავთ თუ არა ჩვენს ინვესტიციებს. ზაზა მამულაშვილსა და ფრონტერას ყველაზე დიდი აქციონერის სტივ ნიკანდროსის ურთიერთობა ყველაზე დიდი შფოთვის საგანია. ნიკანდროსი ჯერ კიდევ ბორდის წევრია და მანამდე დირექტორის პოზიციას იკავებდა,“ - განმარტავს ფრონტერას ერთერთი აქციონერი სტიუარტ მილარდი.

„არავის აქვს სრული ინფორმაცია თუ რა ხდება ამჟამად , ყველა საკუთარ მოსაზრებას ეფუძნება და იმ ცნობებს, რაც პრესაში ვრცელდება. თითქოს გამოცნობანას ვთამაშობთ. ალბათ სანამ სასამართლო არ დასრულდება, არ სურთ საქმის ჩახლართვა ბევრი ინფორმაციის გავრცელებით. აგვისტოდან საქართველოს ფრონტერას საქმიანობაში ზაზა მამულაშვილი აღარ არის, მხოლოდ ეს ვიცით, სხვა მხრივ მდუმარებაა“ - ამბობს კიდევ ერთი აქციონერი დეივ ჰაფსი.

„Frontera Resources-მა ყოფილ გენერალურ დირექტორთან ზაზა მამულაშვილთან თანამშრომლობა შეწყვიტა და ის დირექტორთა საბჭოდან გაირიცხა. კომპანიამ ამავდროულად შეიტანა სარჩელი მიყენებული ზარალის ანაზღაურების მოთხოვნით. კომპანია აპირებს ასევე გაასაჩივროს ზაზა მამულაშვილისგან დაუმსახურებელი საპასუხო სარჩელი, რომელიც მან რამდენიმე კვირის წინ დირექტორთა საბჭოს წინააღმდეგ შეიტანა, და ქართული და ამერიკის კანონების ყველა სიმკაცრით შეეცდება მათ აღსრულებას. ფრონტერა ამჟამად ბიზნეს-გეგმის შემუშავების პროცესშია, საქმე ეხება ასევე ახალი მენეჯერული გუნდის ჩამოყალიბებას. დამატებით საინტერესო დეტალებს უახლოეს მომავალში შეგატყობინებთ,“ -  ნათქვამია გავრცელებულ მეილში, რომელიც ფრონტერას აქციონერებმა ცოტა ხნის წინ, ხანგრძლივი ლოდინის შემდეგ სათავო ოფისიდან მიიღეს.

„კომერსანტმა“  ინფორმაცია თავად ფრონტერას ყოფილ დირექტორთან გადაამოწმა. ზაზა მამულაშვილის განმარტებით, მიუხედავად იმისა, რომ კომპანიის მენეჯერულ საქმიანობაში ჩართული აღარ არის, ის კვლავ რჩება ფრონტერას ყველაზე დიდ აქციონერად და კრედიტორად.

„ახლა რესტრუქტურიზაცია მიმდინარეობს. მე Frontera resources -ის ყველაზე დიდი აქციონერი და ყველაზე დიდი კრედიტორი ვარ, მაგრამ  ფრონტერას ყოველდღიურ მენეჯმენტში აღარ ვარ ჩართული. ანუ, როგორც კომპანიის ოფიცერი აღარ ვარ. რამდენიმე ათასი აქციონერია სულ ჯამში. ეს ყველაფერი სამუშაო პროცესებზე არანაირად არ აისახება, საქართველოს მიღმა ხდება. რაღაც კომპანიები ემატება , ზოგი  აკლდება, ზოგის ლიკვიდაცია და გაერთიანება მოხდება. ეს ჯგუფი ძალიან ბევრ კომპანიას მოიცავდა. საქართველოში არაფერი  იცვლება, ფრონტერას აქვს სახელმწიფოსთან ხელშეკრულება და ჩვეულებრივ ვითარდება პროცესები, როგორც ადრე. რაღაც ნაწილში ჩამოვცილდი საქმეებს და რაღაც ნაწილში ვრჩები. ისეთ ნაწილში რასაც აქტივი არ აქვს, არ ვარ ჩართული, სადაც არის აქტივები იქ  კვლავინდებურად ვმონაწილეობ. სამუშაოები 24 საათის რეჟიმში გრძელდება ყველგან იქ, სადაც ბოლო 23 წლის მანძილზე კომპანია მოიპოვებს ნავთობს.

სამომავლოდ ვცდილობთ, რომ გავაფართოვოთ და დავამატოთ ახალი მიმართულება „მწვანე ენერგეტიკის“ განხრით. დაახლოებით 150 მილიონიანი პროექტია და 2-3 თვეში გავაკეთებთ განაცხადს,“- განმარტავს ზაზა მამულაშვილი.

“ფრონტერა” საქართველოში 1997 წლის შემდეგ დედოფლისწყაროსა და მარნეულის მუნიციპალიტეტებში მუშაობს. ქართულ საზოგადოებას კომპანია მოულოდნელი განცხადებით ახსოვს. „ფრონტერა“ ამტკიცებს, რომ საქართველოს ნავთობისა და გაზის იმდენად დიდი მარაგები აქვს, რომ ენერგორესურსების ექსპორტის დაწყებაც კი შეუძლია.

„ფრონტერას“ ვერსიით, 1997 წლიდან საქართველოში განხორციელებულიინვესტიციის მოცულობა 580 მილიონ დოლარს აღწევს, სახელმწიფო კი ამტკიცებს, რომ თანხა რამდენიმე ასეული მილიონით ნაკლებია.

2019 წლის ზამთარში კომპანიის ქართველი თანამშრომლები გაიფიცნენ 11 თვის განმავლობაში ხელფასის გადაუხდელობის გამო. საბოლოოდ, მათი ხელფასები საქართველოს ნავთობის სახელმწიფო კომპანიამ გაისტუმრა.