ქართული ოცნების დეპუტატი, ირაკლი ზარქუა მიესალმება რუსეთთან პირდაპირი ფრენების აღდგენას, იგი ამას ეკონომიკის გაუმჯობესების კუთხით აფასებს და ამბობს, რომ ამით "ტურიზმი წინ წაიწევს".
"მე მგონია, პირდაპირი რეისები თუ აღდგება, რომელსაც არ დაადგა საშველი, ძალიან გაუხარდება ჩემს მოსახლეობას, ჩემს ეკონომიკას და წინ წაგვწევს. ვიღაც იტყვის, რუსეთიდან... რუსეთში ექსპორტი გადის, რა? სააკაშვილის დროსაც გადიოდა. არ ვიცი, ვინ აცხადებს, სერიოზული შედეგი მოყვება თუ არა, ისინი გადამგდებები არიან. თუ აღდგა პირდაპირი მიმოსვლა, მივესალმები, ზუსტად ვიცი, რომ ჩემი ეკონომიკა, ჩემი ტურიზმი წინ წაიწევს", - თქვა ზარქუამ.
რუსეთის საგარეო საქმეთა მინისტრის ყოფილი მოადგილის, გრიგორი კარასინის განცხადებით, რუსეთი მზადაა საქართველოსთან ავიამიმოსვლის აღდგენის საკითხი განიხილოს.
"ჩვენ მზად ვართ ეს განვიხილოთ. ვფიქრობ, ეს ადრე თუ გვიან გადაწყდება", - განაცხადა კარასინმა, თუმცა კონკრეტულ ვადებზე მას არ უსაუბრია.
მისივე თქმით, რუსეთის საკითხებში პრემიერმინისტრის სპეციალურ წარმომადგენელთან, ზურაბ აბაშიძესთან შეხვედრა შესაძლოა სექტემბერ-ოქტომბერში გაიმართოს. კარასინმა განმარტა, რომ შეხვედრის ადგილი ჯერ შეთანხმებული არაა და ყველაფერი პანდემიაზეა დამოკიდებული.
წყარო: ფორმულა