21 ოქტომბრიდან ქართველ მომხმარებლებს წვდომა ZARA-ს სრულ კატალოგზე აქვს. ქალის, მამაკაცისა და ბავშვის განახლებადი კოლექციების შეძენა ZARA-ს აპლიკაციისა და zara.com ვებ-გვერდის საშუალებით იქნება შესაძლებელი, მიწოდება კი მთელი საქართველოს მასშტაბით განხორციელდება.
ონლაინ შეძენის სერვისი 64 ქვეყანაშია ხელმისაწვდომი. საქართველო პირველია ამიერკავკასიის ქვეყნებს შორის, სადაც ამ სერვისის დანერგვა გახდა შესაძლებელი. ZARA-ს ექსკლუზიური ფრენშაიზ პარტნიორი საქართველოში „რითეილ გრუპ ჯორჯიაა“, კომპანიაში აცხადებენ საქართველოში ონლაინ გაყიდვების დაწყება ბრენდის გლობალური სტრატეგიის ნაწილია.
„თანამედროვე მსოფლიო გამოწვევების პასუხად ონლაინ შეძენის ინტერესი და მასზე მოთხოვნა ყოველდღიურად იზრდება. ZARA მის ერთგულ მომხმარებლებს სთავაზობს როგორც სრულიად განსხვავებულ შესყიდვის გამოცდილებას, ასევე ხელმისაწვდომობას ბრენდის სრულ კატალოგზე, მათ შორის იმ მოდელებზეც, რომლებიც კონკრეტულ პერიოდში საქართველოს მაღაზიებში არ არის წარმოდგენილი. ვიცით, რომ ZARA-ს მომხმარებლები ამ შესაძლებლობას მოუთმენლად ელოდნენ და, იმედი გვაქვს, გავახარებთ ამ სიახლით“, - აცხადებენ რითეილ გრუპ ჯორჯიაში.
შეგახსენებთ, ZARA მსოფლიოს უმსხვილესი ტანსაცმლის საცალო ვაჭრობის ჯგუფის წარმომადგენელია და 96 ქვეყანაში ოპერირებს მაღაზიებით. ბრენდი მომხმარებლებს ქალის, მამაკაცისა და ბავშვის ტანსაცმლის, ფეხსაცმლისა და აქსესუარების კოლექციებს სთავაზობს.
ბაჩო ადამია