„მაქსიმალურად ვეცდებით, რომ ფასები არ გავზარდოთ, ყოველ შემთხვევაში, სექტემბრის ჩათვლით. ხარჯები გაგვეზრდება, მაგრამ ადგილობრივებისთვის ფასდაკლებები ყოველ წელს გვქონდა და ქართველებს წელსაც 10-15 პროცენტით დაბალ ფასებს შევთავაზებთ. თუმცა, ამ სეზონზე ჯერ ჯავშნები ძალიან ცოტაა, ასეთი დაბალი აქტივობა არასდროს ყოფილა.“ - ამის შესახებ „კომერსანტს“ სასტუმრო „სვანეთის“ გაყიდვების მენეჯერმა ნინო ჯაფარიძემ განუცხადა.
მესტიაში ზაფხულის სეზონის გახსნასთან დაკავშირებით მოლოდინები როგორც სასტუმროების, ასევე მუნიციპალიტეტისთვის, ამ ეტაპზე ბუნდოვანია. გასულ წელს მესტიის ზაფხულის ტურისტული სეზონი 10 ივნისს ოფიციალურად უკვე გაიხსნა, თუმცა, პანდემიის გამო სასტუმროები წელს მინიმალურ აქტივობას ელოდებიან.
გამომდინარე იქიდან, რომ აქცენტი წელს შიდა ტურიზმზე კეთდება, არსებობს ვარაუდი, რომ მცირე სასტუმროები უფრო დიდი დატვირთვით იმუშავებენ, ვიდრე მსხვილი ბრენდული სასტუმროები. თუმცა ამის მოლოდინი ადგილობრივ მცირე სასტუმროებს ნაკლებად აქვთ. „კომერსანტი“ დაინტერესდა სვანეთის ტურისტული ბიზნეს სექტორის გეგმებით, ამიტომ მედიაჰოლდინგი რეგიონში არსებულ სასტუმროს ინდუსტრიის ნაწილს დაუკავშირიდა.
საოჯახო სასტუმრო „სვანეთი“, მოსალოდნელი რეგულაციების გამო, თანამშრომლების რაოდენობის გაზრდას აპირებს, თუმცა სასტუმროს მარკეტინგის მენეჯერი განმარტავს, რომ ფასები ადგილობრივებზე მორგებული დარჩება.
„ჩვენ აქტიური სეზონი მაისში გვეწყებოდა, თუმცა ახლა სამწუხაროდ, ყველა ჯავშანი გაგვიუქმდა. ივნისის ჯავშნებიც ეტაპობრივად უქმდება, რადგან უბრალოდ ფიზიკურად ვერ შემოდიან სტუმრები უცხო ქვეყნებიდან. ჩვენ ვემზადებით და ყველა რეგულაციას დავიცავთ, მაგრამ მთავარია საზღვრები გაიხსნას და სტუმრებმა შემოსვლა შეძლონ. ის შეღავათები, რაც ბანკებისგან გვაქვს, ალბათ დააბალანსებს გაზრდილ ხარჯებს, რაც საკმაოდ დიდი იქნება. რეგულაციები და დისტანციის დაცვა ჩვენთვის არ იქნება პრობლემა იმიტომ, რომ დიდი სივრცე აქვს ჩვენს სასტუმროს კვების დარბაზებითა და ღია სივრცით. ალბათ მომსახურე პერსონალის დამატება მოგვიწევს რეგულაციების გამო. შესაძლოა, ამ მხრივ პატარა სასტუმროებს უფრო გაუჭირდეთ დისტანციის შესახებ რეგულაციის დაცვა და კვების საათობრივი დარეგულირება გახდეს საჭირო.“ - განმარტავს ნინო ჯაფარიძე.
სასტუმრო „ჩუბო“ მესტიაში გახსნას 15 ივნისიდან გეგმავს, თუმცა უცხო ქვეყნის მოქალაქეების ჯავშნები ამ ეტაპზე სასტუმროში გაუქმებულია.
„ჯერჯერობით ველოდებით რეგულაციებს და ალბათ 15-ის მერე გავიხსნებით, გააჩნია რა პროტოკოლები დაწესდება. ჯავშნები გვაქვს ივნისში, მაგრამ ეს უცხოელებზე იყო გათვლილი და ზუსტად ვიცით ვერ ჩამოვლენ. ადგილობრივებისგან ჯერჯერობით მხოლოდ სიტყვიერი დაინტერესებაა, მაგრამ ოფიციალურად არ შემოსულა ჯავშნები. ფაქტია, რომ რეგულაციები და ზედმეტი ხარჯი მოგვიწევს, მაგრამ სხვა გზა არ არის . მოლოდინი გვაქვს და იმედი არსებობს და ვნახოთ რა სეზონი იქნება“ - ამბობს სასტუმრო „ჩუბოს“ მეპატრონე ანა მარლანი.
სასტუმრო „უშბა“ ასევე არ გეგმავს მომსახურების ფასების გაზრდას რეგულაციების გამოწვეული ხარჯის გამო, ამასთან „უშბას“ მეპატრონე თეა ჟორჟოლიანი ადგილზე მეორე საოჯახო სასტუმროს აშენებას აპირებს.
„ჯავშნების რაღაც ნაწილი გაგვიუქმდა, რაღაც ნაწილი დარჩა. ბოლოს ესპანელმა ტურისტება გადაიფიქრეს ჩამოსვლა. უსაფრთხოების ზომები რაც დაწესდება ბოლომდე დავიცავთ, რადგან ეს ჩვენს ინტერესებშიც არის, რომ სიტუაცია არ გავამწვავოთ. თუმცა, არა მგონია რომ ფასები გავზრდოთ. ჩვენზე ბევრი რამ არ არის დამოკიდებული, ამიტომ მგონია რომ ეს სეზონი ჩავარდნილი იქნება სვანეთის სასტუმრო ბიზნესისთვის. თუმცა, „ აწარმოე საქართველოს“ პროგრამით ვაშენებთ კიდევ საოჯახო სასტუმროს,“-აცხადებს თეა ჟორჟოლიანი.
„კომერსანტი“ მესტიის ტურისტული სეზონის მოლოდინებსა და გეგმებზე მესტიის გამგებელს კახა ჟორჟოლიანსაც დაუკავშირდა, რომელიც მომსახურების სფეროში ფასების 10 პროცენტიან ზრდას ვარაუდობს.
„ჯერ გაიხსნას სეზონი და მერე რეგულაციები ამოქმედდეს. წინასწარ ვერ ვიტყვით ვერაფერს. მე ვფიქრობ, რომ შეიძლება ფასი გაიზარდოს სასტუმროებში მინიმუმ 10 პროცენტით. საბაგიროებზე ფასი არ გაიზრდება, თუმცა, დასაჯდომები გაკონტროლდება. სეზონის ამუშავება და შიდა ტურიზმის დაშვება კარგი იქნება ჩვენი სასტუმრო სექტორისთვის. თუ რეგულაციებით გავაგრძელებთ ბიზნესის წარმოებას, იმედია გადავრჩებით. დაახლოებით 6 თვის მერე, უფრო სწორი შედეგი გვეცოდინება ეკონომიკურად. ბიზნესის მზაობა არსებობს, მაგრამ ეს არ არის მხოლოდ მუნიციპალიტეტზე დამოკიდებული,“- განმარტავს კახა ჟორჟოლიანი
ტურიზმის ადმინისტრაცია მესტიაში ზაფხულის სეზონის გახსნის დეტალებზე ჯერჯერობით არ საუბრობს, როგორც უწყებაშ განაცხადეს, ზონების პრეზენტაციები მოგვიანებით გაკეთდება და ახლა სამუშაოები მიმდინარეობს.
გასული წლის მესტიის ზაფხულის ტურისტული სეზონი სათხილამურო შეჯიბრით, საზეიმო კონცერტებითა და სვანური კულტურის ატრიბუტების გამოფენით ჩატარდა. ჯერჯერობით უცნობია, როგორი იქნება 2020 წლის პოსტპანდემიური სვანეთის სეზონი ბიზნესისა და მოსახლეობისთვის.
მარიამ მორგოშია