კორონავირუსის გავრცელების პრევენციის მიზნით რესტორნების, სასტუმროებისა და პატარა საცხობების დახურვამ ყველზე მოთხოვნა მნიშვნელოვნად შეამცირა. შემცირებული მოთხოვნის ფონზე ყველის პატარა საწარმოები დახურვის საფრთხის წინაშე დგანან.
„მოთხვნის ასეთი შემცირების ფონზე, პატარა საწარმოები თითქმის გაჩერდნენ. მართალია პატარა დანაზოგები ყველას აქვს, მაგრამ ცოტა ხანში ეს დანაზოგიც ამოიწურება. რძის მწარმოებელი ფერმერებიც რთულ სიტუაციაში არიან. ნატურალური რძეც აღარ იყიდება. მწარმოებელთა ნაწილმა რძის შეძენაზე უარი განაცხადა, რადგან აღარ იციან ამდენი ყველი სად წაიღონ,“ – განმარტავს ანა მიქაძე-ჩიკვაიძე.
როგორც ყველის მწარმოებელთა ასოციაციის თავმჯდომარე ანა მიქაძე-ჩიკვაიძემ “ბიზნესპარტნიორთან” განაცხადა, თუ ეს პრობლემა ახლო მომავალში არ მოგვარდება, ქვეყანა შესაძლოა სავალალო შედეგების წინაშე აღმოჩნეს.
პრობლემიდან გამოსავალს ასოციაციის თავმჯდომარე სახელდახელო საველე მაცივრების წარმოებაში ხედავს, რომლებიც ფერმერებს ყველის შენახვის საშუალებას მისცემს, რაც პროდუქტს გაფუჭებისგან იხსნის. საჭიროების შემთხვევაში ანა მიქაძე-ჩიკვაიძე მზადყოფნას გამოთქვამს ამ პროცესის ორგანიზება საკუთარ თავზე აიღოს.
„ყველი ხომ პროდუქტია, თუ მას შესანახად საჭირო პირობებს არ შევუქმნით, უბრალოდ გაფუჭდება და დაიკარგება. სამომავლოდ კი, როდესაც რესტორნები, სასტუმროები და მცირე საცხობები მუშაობას კვლავ განაახლებენ ყველის საკმარისი რაოდენობა ქვეყანაში ფიზიკურად აღარ იქნება. ამისათვის საჭიროა გაკეთდეს სპეციალური საველე მაცივრები, რომლებშიც ყველისთვის საჭირო მიკროკლიმატი შეიქმნება. თუ შეიქმნება კარგი მაცივრები, პროდუქტის შენახვა ერთი წლითაც კი იქნება შესაძლებელი,“ – აცხადებს ყველის მწარმოებელთა ასოციაციის თავმჯდომარე.
1tv.ge
ყველი
