პანდემია თითქმის ყველა სფეროს წარმომადგენელებზე უარყოფითად აისახა, თუმცა, ერთ-ერთ ყველაზე მძიმე მდგომარეობაში ხელოვანები და კულტურის სფეროს წარმომადგენლები აღმოჩნდნენ. დისტანციურ რეჟიმში მუშაობა და რეკომენდაციების დაცვა ანსამბლების და სტუდიების უმრავლესობისთვის რთული აღმოჩნდა.

ანსამბლ „თორდას“ ხელმძღვანელი თამუნა ალადაშვილი „კომერსანტთან“ საუბრისას აღნიშნავს, რომ ბავშვთა სტუდიებისთვის არსებული რეგულაციების დაცვა ძალიან რთულია, გარდა ამისა, ბიზნესის კუთხითაც დიდი დანაკარგია, რადგან მოსწავლეების რაოდენობის შემცირება მოუწევთ.

„ჩვენი მუსიკალური სტუდია მარტის დასაწყისიდან უკვე აღარ მუშაობს, ბოლო ხელფასი თებერვალში ავიღეთ, იმის შემდეგ დისტანციურად მუშაობა ვცადეთ, თუმცა, როცა ბავშვს ვოკალში ამეცადინებ ფიზიკურად შეუძლებელია ამის ონლაინ სწავლება. სტუდიების ხელმძღვანელები შევიკრიბეთ და შევეცადეთ ჯანდაცვის სამინისტროსთვის ხმა მიგვეწვდინა, მოვითხოვეთ რეგულაციები, რომლებიც მოგვცეს, მაგრამ იმდენად რთული შესასრულებელია, რომ ფაქტობრივად აზრი არ აქვს. მცირე ზომის დარბაზში უნდა დავიცვათ დიდი დისტანცია, რომელშიც გარდა იმისა, რომ ფართის პრობლემაა, თუ ერთმანეთის ხმა სიმღერის დროს ვერ გაიგეს, შეუძლებელია ასე მუშაობა. ვეღარ ტარდება კონკურსები, ფესტივალები, ამიტომ ერთადერთი რაც დაგვრჩენია ის არის, რომ სექტემბერს დაველოდოთ, თუმცა ,ისეც ბუნდოვანია, შემოდგომაზე დაიწყება თუ არა სწავლა.

ბიზნესის კუთხითაც დიდი დანაკარგი იქნება, რადგან თუ ადრე 20-30 ბავშვს ერთდროულად ვამეცადინებდით, ახლა 10 ბავშვზე მეტის დასმის უფლება არ გვაქვს. ამ ეტაპზე საბადნიეროდ იჯარის გადახდა არ გვიწევს, თუმცა, სექტემბრიდან ალბათ განახლდება და ჩვენი თხოვნა იქნება სახელმწიფოსთვის, რომ ხელი შეგვიწყონ ამ საკითხში და ერთი წლის განმავლობაში შეგვიმცირონ ან შეგვიჩერონ გადასახადი. კულტურის სფეროს წარმომადგენლები უმუშევრად დავრჩით და ფაქტობრივად,  ყველაზე გაურკვეველ მდგომარეობაში ვართ“, - აცხადებს თამუნა ალადაშვილი.

ქართული ხალხური ცეკვების სტუდია „ვარძიას“ ხელმძღვანელი ქეთევან ზარდიაშვილი აღნიშნავს, რომ გარდა იმისა, რომ ამ ეტაპზე მუშაობას ვერ ახერხებენ, სტუდიების უმრავლესობისთვის  ისიც ბუნდოვანია თუ როდის შეძლებენ სწავლის განახლებას.

„პირველი ინფიცირებულის დასახელებისთანავე რეპეტიციები შევწყვიტეთ და უმუშევრად დავრჩით. რეგულაციები დაგვიწესეს, მაგრამ გამორიცხულია მოცეკვავე პირბადით აცეკვო. სექტემბერს ველოდებით, მაგრამ როგორც მაქვს ინფორმაცია, სწავლის ონლაინ გაგრძელებას გეგმავენ ანუ ამ დრომდე ბუნდოვანია თუ ზოგადად როდის მოგვეცემა მუშაობის საშუალება. თავიდანვე შევეცადეთ ონლაინ რეჟიმზე გადასვლა, მაგრამ არც გამოხმაურება იყო და ზოგადადაც ძალიან რთულია. ჩემი თხოვნა იქნებოდა მთავრობის მიმართ, რომ ინდ. მეწარმეებს მხოლოდ ერთჯერადად 300 ლარით დაეხმარნენ, რაც ძალიან მიზერია, მათგან ფაქტობრივად  მხარდაჭერა არ გვიგრძვნია“, - აღნიშნა ქეთევან ზარდიაშვილმა.

ფესტივალი „მზიანი საქართველოს“ დამფუძნებელი თეა დავითაია აცხადებს, რომ პანდემიის პირობებში ხელოვანი ადამიანები ვისაც სტაბილური შემოსავალი არ აქვს, ყველაზე ცუდ მდგომარეობაში აღმოჩნდნენ.

„ღონისძიებები და ფესტივალები თვეების განმავლობაში შეჩერებულია. მართალია ერთი ღონისძიება ჩავატარეთ რამდენიმე დღის წინ, მაგრამ ძალიან გართულებული იყო არსებული რეკომენდაციების დაცვა. ყველაზე სამწუხაროა, რომ ბოლო არ უჩანს როდემდე გაგრძელდება ასეთი ვითარება და აკრძალვები, თუმცა ხელოვანი ადამიანებისთვის ვინც ასე ვთქვათ გამომუშავებით ვცხოვრობთ და სტაბილური შემოსავალი არ გვაქვს, ყველაზე ცუდ მდგომარეობაში აღმოვჩნდით. გვაქვს რაღაც გეგმები, თუმცა ძალიან რთულია ასეთ ვითარებაში მუშაობა, განსაკუთრებით ასეთი ვითარებაში, როდესაც დასასრულს ბოლო არ უჩანს. მთავრობამ ცოტა უნდა შეამსუბუქოს ასეთი მკაცრი რეგულაციები, რომ მისი დაცვა შესაძლებელი იყოს“, - განმარტა თეა დავითაიამ.

ნინო თამაზაშვილი