თბილისში ქართული ღვინის სადეგუსტაციო ახალი სივრცე „ბარბალეს მარანი“ სექტემბერში გაიხსნა, რომლის მფლობელი, ცნობილი ადვოკატი ზვიად კორძაძეა. 2020 წლის გამოწვევებზე, ღვინის ბაზარზე და სამომავლო გეგმებზე ისაუბრა „კომერსანტთან“ ზვიად კორძაძემ.
„წლებია ამ საქმეს ვაკეთებ, უბრალოდ ჩემი პროდუქციის ბაზარზე გამოტანა მას შემდეგ გადავწყვიტე, რაც დავრწმუნდი, რომ მომხმარებლისთვის ჩემი ღვინის შეთავაზება შემეძლო. ღვინის ბიზნესში ახალი სიტყვის თქმა არ ნიშნავს იმას, რომ უბრალოდ გააკეთო ღვინო და გასაყიდად გამოიტანო, თუ შენი პროდუქტი რაღაცით არ გამოირჩევა და მომხმარებელს სიახლეს არ სთავაზობს, მაშინ ეს არ უნდა გააკეთო“, - აღნიშნა ზვიად კორძაძემ.
კორძაძის განმარტებით „ბარბალეს ღვინის მარანი“ ცდილობს ყურძნის იმ ჯიშების წამოწევას, რომლებიც იმერეთში მოდის. ესენია: ცოლიკაური, ციცქა, კრახუნა, სხვა.
„ის ყურძნის ჯიშები, რომლებიც იმერეთში მოდის, ცოლიკაური, კრახუნა, ციცქა და სხვა. უფრო დაჩაგრული აღმოჩნდა იმ მარტივი მიზეზის გამო, რომ კახური ჯიშები, თუნდაც რქაწითელი უფრო მოსავლიანია. კომუნისტებს კი გეგმის შესრულება უფრო აინტერესებდათ, ვიდრე მრავალფეროვნება და ეს თვითმყოფადი ჯიშები დაიჩაგრა.
ჩემს მარანში მათ წამოწევას ვცდილობ. აღმოვაჩინე ერთი თავისებურება, რომ უცხოელებისთვის იმერული ღვინოები, რომელიც მეც ძალიან მომწონს გაცილებით უფრო ახლობელი და მისაღებია, ვიდრე მძიმე ღვინო. როცა ტურისტი ადგილზე ჩამოდის, მისთვის ძალიან მნიშვნელოვანია ადგილობრივი ტრადიციის ნახვა და მძიმე ღვინის დაგემოვნება, მაგრამ წასაღებად და ექსპორტისთვის ცოლიკაურს და ციცქას ენიჭება უპირატესობა“, - აღნიშნა ზვიად კორძაძემ.
ზვიად კორძაძემ ახალ მიმართულებაზე და სასაჩუქრედ შემოტანილ ღვინოებზეც ისაუბრა. მისი განმარტებით, სასაჩუქრედ ანდრეს ინიესტას, ანჯელინა ჯოლის და ბრედ პიტის ბრენდირებული ღვინოები შემოიტანეს.
„ჩვენ ადგილობრივ ღვინოსთან ერთად შემოვიტანეთ ანდრეს ინიესტას ღვინო, რომელიც ასევე გემოვნური თვისებებითაც გამორჩეულია, ვფიქრობთ რომ მისი გულშემატკივრებისთვის ძალიან საინტერესო იქნება.
მეორე ცნობილი ღვინო რაც გვექნება ეს არის ანჯელინა ჯოლის და ბრედ პიტის სახელობის, რომელიც ახლახანს შემოვიტანეთ. მხოლოდ სახელებით არ ვარჩევ ღვინოს, ჯერ ვსინჯავ და მერე ვიღებ გადაწყვეტილებას შემოვიტანო თუ არა. სამომავლოდ ცნობილი ადამიანების მიმართულებით რამდენიმე სიახლეს ვგეგმავთ“, - აღნიშნა ზვიად კორძაძემ.
პანდემიის პერიოდში „ბარბალეს მარანს“ დისტანციურ რეჟიმზე გადასვლა მოუწია, თუმცა როგორც კორძაძემ აღნიშნა, განვითარებაზე და სამომავლო გეგმებზე მუშაობას აგრძელებს და ტურიტული სეზონის აღდგენისთვისაც ემზადება.
„გორგასლის ქუჩაზე აღმოვაჩინე ძველი სარდაფი, რომელიც შევიძინე და ტურისტული ბიზნესისთვის ვამზადებ. დარწმუნებული ვარ, რომ 2021 წელი იქნება თავისუფალი იმისგან, რამაც 2020-ში დაგვაბრკოლა. მგონია, რომ ვინც გაუძლებს და რისკს გასწევს, 2021 წელს დაუფასდება.
მინდა, ბიზნესს და იმ ადამიანებს იქნებიან მცირე თუ დიდ ბიზნესში ჩართულები ვუსურვო რომ მათი შრომა იყოს დაფასებული. ადამიანებს ქვეყნისგან და სახელმწლიფოსგან ბევრი რამ არ სჭირდებათ, მათ მხოლოდ ის უნდათ, რომ ბიზნესის წარმოების საშუალება ჰქონდეს. ყველას ვუსურვებ რომ მათი ბიზნესი იყოს წარმატებული და ამაში სახელმწიფომ ხელი არ შეუშალოს, ქვეყანას კი ვუსურვებ, რომ რაც შეიძლება მეტი დასაქმებული იყოს, მეტი ადამიანი იყო შრომაში და ნაკლები საუბარსა და კრიტიკაში, ეს არის საშუალო ფენის შექმნის ერთ-ერთი მთავარი გარანტია, რაც ქვეყნის წარმატების გარანტიაა“, - აღნიშნა ზვიად კორძაძემ.
„ბარბალეს მარანის“ სამომავლო გეგმებში პროდუქციის ექსპორტზე გატანაც შედის, თუმცა ეპიდემიოლოგიური სიტუაციიდან გამომდინარე, ამ ეტაპზე, ორიენტირებულები ქართული ბაზრის ათვისებაზე არიან.