გასულ წელს კომპიუტერების იმპორტმა ყველა დროის რეკორდი მოხსნა. კერძოდ, საქსტატის მონაცემებით, 2021 წელს საქართველომ 147,680 მლნ აშშ დოლარის კომპიუტერები შეიძინა, რაც თითქმის, 128%-ით მეტია წინა წლის მაჩვენებელთან შედარებით. 2020 წელს 64,808 მლნ აშშ დოლარის კომპიუტერული ტექნიკის იმპორტი განხორციელდა.

რაც შეეხება პანდემიამდელ მაჩვენებელს, საქსტატის მონაცემებით, 2019 წელს საქართველომ 76,002 მლნ აშშ დოლარის კომპიუტერები შეიძინა, 2018 წელს - 126,667 მლნ აშშ დოლარის, 2017 წელს - 97,689 მლნ აშშ დოლარის, 2016 წელს - 62,227 მლნ აშშ დოლარის, 2015 წელს - 58,873 მლნ აშშ დოლარის და ა.შ.

„ბიზნესპრესნიუსი“ დაინტერესდა იმ ქვეყნების ჩამონათვალით, საიდანაც საქართველო კომპიუტერებს ყიდულობს.

ტოპ-10 ქვეყანა, საიდანაც 2021 წელს კომპიუტერების იმპორტი განხორციელდა:

ჰონ-კონგი - 58,378 მლნ აშშ დოლარი
ჩინეთი - 27,591 მლნ აშშ დოლარი
ნიდერლანდი - 10,892 მლნ აშშ დოლარი
ჩეხეთი - 8,285 მლნ აშშ დოლარი
არაბთა გაერთიანებული საამიროები - 6,791 მლნ აშშ დოლარი
შვეიცარია - 6,539 მლნ აშშ დოლარი
ირლანდია - 3,798 მლნ აშშ დოლარი
რუსეთი - 2,606 მლნ აშშ დოლარი
გერმანია - 2,564 მლნ აშშ დოლარი
კორეა, რესპუბლიკა - 2,395 მლნ აშშ დოლარი
ცნობისთვის, გასულ წელს კომპიუტერების გაყიდვებმა მთელ მსოფლიოშიც ბოლო 10 წლის უმაღლეს მაჩვენებელს მიაღწია. The Brussels Times-ის შეფასებით, ეს დიდწილად დისტანციური მუშაობის რეკომენდაცია-ვალდებულებებით, ასევე, ბავშვთა განათლების ონლაინ რეჟიმში გადატანით აიხსნება.

გამოცემას ბაზრის ანალიტიკოსების მონაცემები მოჰყავს, რომლის მიხედვითაც კომპიუტერების გაყიდვები, 2020 წელთან შედარებით, 10-დან 15%-მდე გაიზარდა. თავისთავად პანდემიური 2020 წელი კომპიუტერების გაყიდვებისთვის ისედაც გამორჩეული წელი იყო. მთლიანობაში, 2021 წელს მსოფლიოში 340-დან 349 მილიონამდე კომპიუტერი გაიყიდა.

bpn.ge