„რთველი 2021“-ის მოსამზადებელი პროცესი კახეთში დაიწყო. სუბსიდირების პროცესში მონაწილე კომპანიებში აცხადებენ, რომ როგორც ფერმერებს, ასევე ბიზნეს-სექტორს მაქსიმალური მხარდაჭერა აქვთ, რომ პანდემიის გამოწვევებს გაუმკლავდნენ. მართალია, ყურძნის კონკრეტული ღირებულება ჯერ გამოკვეთილი არ არის, თუმცა ინდუსტრიაში უკვე იციან, რომ 1 კგ. ყურძნის აფსი სულ მცირე 90 თეთრი იქნება.
როგორც „კომერსანტთან“ კომპანია „შუმის“ ხელმძღვანელი კაკო ცოფურაშვილი ამბობს, წლევანდელ სეზონზე კომპანია დაახლოებით 1500 ტონამდე ყურძნის მიღებას გეგმავს.
„სუბსიდიის პროგრამაში ჩავერთვებით, ვაპირებთ მივიღოთ 200 ტონაზე მეტი ყურძენი „რქაწითელი“ და „მწვანე“. ჯამში, სავარაუდოდ, 1500 ტონამდე მოსავალს მივიღებთ. რამდენადაც ვიცი, ფასი შარშანდელზე ნაკლები არ იქნება, სავარაუდოდ, 90 თეთრის ფარგლებში. ჩვენ საკუთარი ვენახები გვაქვს სხვადასხვა ადგილ-წარმოშობის მიკრო ზონებში, გარკვეულ რაოდენობას იქიდან ვიღებთ, დანარჩენებს იმ ფერმერებისგან შევისყიდით, რომლებთანაც წლების განმავლობაში ვთანამშრომლობთ. ვიმედოვნებთ, რომ რთველი ჩატარდება ხარისხიანად და იმ ღონისძიებების შესაბამისად, რაც ინდუსტრიას მოგვეთხოვება“, - ამბობს კაკო ცოფურიშვილი.
Schuchman Wines Georgia სუბსიდიის პროგრამაში ჩართული კომპანიებიდან ერთ–ერთია. კომპანიის აღმასრულებელი დირექტორის, ნუცა აბრამიშვილის თქმით, სამზადისი დაწყებულია და დაახლოებით 2 კვირაში რთველი 21 აქტიურ ფაზაში შევა. მისი ინფორმაციით, წლევანდელ სეზონზე კომპანია 150 ადამიანის დასაქმებას უზრუნველყოფს.
„წელს, ანტიკრიზისული პროგრამის ფარგლებში დაიშვა სუბსიდირება, რაც სწორი გადაწყვეტილებაა. ეს არის სუბსიდია „რქაწითელსა“ და თეთრი ჯიშის ყურძენზე, რათა არ დარჩეს მოსავალი და ამავე დროს სახელმწიფოს მხრიდან გლეხებს მაქსიმალური მხარდაჭერა ჰქონდეთ. რთველი დაიწყება ძალიან მალე კახეთში, პირველ ეტაპზე ვიღებთ „შარდონეს“ მოსავალს, ეს არის უცხოური ჯიშის ყურძენი, რომელიც შედარებით ადრე იწყებს მომწიფებას, 10 სექტემბრის კი ჩვენს საკუთარ რთველს დავიწყებთ. რესურსის 90% საკუთარი ვენახებიდან გაგვაჩნია. მართალია, ნაკლებად ვართ ჩამბარებელი მხარე, თუმცა ამავე დროს სუბსიდირების პროგრამაშიც ვერთვებით. 2 კვირაში აქტიური სეზონი დაიწყება და ფასიც დარეგულირდება მოთხოვნის შესაბიმისად, მოლოდიონია, რომ წინა წლის ანალოგიური ფასი იქნება წელსაც. როგორც შარშან, მიმდინარე სეზონზეც დაახლოებით 150 ადამიანს დავასაქმებთ, აქედან ყველა ადგილობრივი მცხოვრებია“, - ამბობს „კომერსანტთან“ ნუცა აბრამიშვილი.
თუმცა სუბსიდიის მიმართ სკეპტიკური განწყობა აქვთ მევანახეების ნაწილს. ,,ჯაყელების მარნის“ მფლობელი, ღვინის მწარმოებელი ზაზა ჯაყელი ამბობს, რომ სჯობდა, სუბსიდირებისთვის განკუთვნილი რესურსი დარგის განვითარებისკენ მიმართულიყო.
,,საკუთარი ვენახები და რამდენიმე მცირე მარანი მაქვს, ხოლო წარმოებული პროდუქცია ძირითადად ექსპორტზე გამაქვს სინგაპურში, იაპონიაში, გერმანიასა და პოლონეთში. წელიწადში 6 000 ბოთლ ღვინოს ვაწარმოებ, თითო ბაზარზე 300 ბოთლი შემაქვს. არ მივესალმები სუბსიდიას, არა იმიტომ, რომ გლეხების საწინააღმდეგო მაქვს რამე, უმჯობესი იქნებოდა, ეს თანხა სხვა მიმართულებით დახარჯულიყო, ინდუსტრია ბევრად კარგ შედეგს დადებდა“, - ამბობს ზაზა ჯაყელი.
სუბსიდიას მიიღებს ყველა ის კომპანია, რომელიც შეიძენს და გადაამუშავებს კახეთის რეგიონში მოწეულ არანაკლებ 100 ტონა რქაწითელის ან კახური მწვანის ჯიშის ყურძენს და 1 კგ ყურძენში მევენახეს გადაუხდის არანაკლებ 0,90 ლარს.
პროგრამის განხორციელების მიზანია, პანდემიით გამოწვეული ვითარება უარყოფითად არ აისახოს მევენახე ფერმერებზე და ღვინის მწარმოებლებზე, სრულად დაბინავდეს ყურძნის მოსავალი და შენარჩუნდეს მევენახეობა-მეღვინეობის დარგის სტაბილური განვითარების ბოლო წლების დინამიკა.
რაც შეეხება მოსავლის საპროგნოზო მაჩვენებელს, 300 ათას ტონამდე აღწევს.
მარი ჩიტაია
რთველი
