ევროკავშირის საბჭომ ყირიმსა და სევასტოპოლში წარმოებული პროდუქციის იმპორტის აკრძალვის შესახებ 2014 წელს მიღებული გადაწყვეტილება 2021 წლის 23 ივლისამდე გააგრძელა. სანქციას კვლავ უერთდებიან ევროკავშირის არაწევრი ქვეყნები, მათ შორის, საქართველო, უკრაინა, მონტენეგრო, ალბანეთი, ისლანდია და ნორვეგია.

„ექსპორტის განვითარების ასოციაცია“ უფროსი მრჩეველი გიორგი გუდაბაძე „კომერსანტთან“ საუბრისას აღნიშნავს, რომ საქართველოს ჩართულობა მსგავსი სახის რუსეთის საწინააღმდეგო მოქმედებებში შესაძლოა ოკუპანტი ქვეყნის მხრიდან  ემბარგოს დაწესების მიზეზი გახდეს.

„ზოგადად ძალიან რთულია ნებისმიერი ნაბიჯის წინასწარ განსაზღვრა, როდესაც რუსეთზე ვსაუბრობთ. რას, როდის და როგორ გადაწყვეტს ეს ქვეყანა რთული საპროგნოზოა. მისი მხრიდან ბარიერების შექმნა უცხო არ არის ჩვენთვის, ემბარგოს ძალიან უმნიშვნელო მიზეზების ფონზე აწესებდა. ერთადერთი რაც ჩვენ დაგვრჩენია ის არის, რომ მაქსიმალურად შევეცადოთ რუსეთზე დამოკიდებული არ ვიყოთ არც ექსპორტის და არც იმპორტის კუთხით. ჩვენ ყოველთვის მოვუწოდებთ ყველა ქართველ ექსპორტიორს და მაქსიმალურად ვეხმარებით მათ, რომ ნაკლებად ვიყოთ რუსეთზე დამოკიდებული, რათა მსგავს შემთხვევებში, თუნდაც როგორიც ყირიმის ანექსიის გამო გახანგრძლივებულ სანქციაზე საქართველოს კვლავ შეერთებაა, მეზობელმა ქვეყანამ ემბარგო ან სხვა შეზღუდვები არ დაგვიწესოს. შესაბამისად, საჭიროა საექსპორტო ბაზრების დივერსიფიცირება და არა მხოლოდ ერთ ბაზარზე დამოკიდებულება. სავაჭრო ბერკეტს და ბარიერს საქართველოსთვის რუსეთი ყოველთვის გამოძებნის, რათა გვაშანტაჟოს. საქართველოს ეკონომიკა დღესაც დიდი დოზით რუსეთზეა დამოკიდებული და უმნიშვნელო მიზეზიც საკმარისია რომ ემბარგო დაგვიწესოს“, - განმარტა გიორგი გუდაბაძემ.

აღსანიშნავია, რომ რუსეთის წინააღმდეგ სანქციები ევროკავშირმა 2014 წელს ყირიმის შეერთებისა და მოგვიანებით, უკრაინის სამხრეთ-აღმოსავლეთით კონფლიქტის გამო შემოიღო. კონფლიქტის შედეგად 2014 წლის შემდეგ 10 ათასზე მეტი ადამიანი დაიღუპა. იმ გადაწყვეტილებაში საუბარი ეხებოდა ყირიმში წარმოებული პროდუქციის რეალიზაციის აკრძალვას და იგივე დატოვეს ძალაში 2021 წლამდე. დეკლარაციას საქართველო 2014 წელს შეუერთდა.