ყაზბეგისთვის, როგორც ტურისტული მარშრუტების ერთერთი ყველაზე ცხელი წერტილისთვის საქართველოში, 2020 წელი ისევე რთული აღმოჩნდა, როგორც სხვა რეგიონებისთვის. თუმცა წლევანდელ ტურისტულ სეზონს, ყაზბეგის მერის ცნობით, სასტუმროების დატვირთულობა უკვე მოჰყვება. როგორც „კომერსანტს“ ყაზბეგის მერი ალექსანდრე ზაგაშვილი უყვება, ტურისტების გააქტიურება შეინიშნება და მუციპალიტეტი 6 მილიონიან განახლების პროექტს იწყებს.
„ახლა უკეთესი მდგომარეობაა, ვიდრე შარშან. შიდა ტურიზმის მხრივ შეინიშნება წინსვლა, სასტუმროებიც ასე თუ ისე დატვირთულია. აქტიურობს ისრაელი, რუსეთი, პოლონეთი, გერმანია.
ამის გარდა, გამოცხადებული
გვაქვს რეგიონების განახლებასთან დაკავშირებული პროექტი - ცენტრის რეაბილიტაცია, რომელიც მიზნად ისახავს
სამი სკვერის განახლებას, ასევე ალექსანდრე ყაზბეგის ქუჩაზე დაახლოებით 12-მდე ობიექტის
რეაბილიტაციას. პროექტი 6,5 მილიონი ლარი დაჯდება. ამ ყველაფერს წელსვე დავიწყებთ.
ყაზბეგის რაიონი
უახლოეს მომავალში საქართველოს სავიზიტო ბარათი გახდება. ტურისტი, რომელიც საქართველოში ჩამოდის, აუცილებლად
მოდის ყაზბეგში. შესაბამისად, ვემზადებით, არის
გარკვეული პროექტები ხეობების რეაბილიტაციაზე , მაგალითად თრუსოს ხეობის. არსებობს
სხვადასხვა ლოკაციები, რომელთა მეტად გააქტიურება გვინდა ტურისტულად და ჩამოსულ სტუმარს
დიდი ხნით დარჩენის საშუალება და თავისუფლება ჰქონდეს,“ - ამბობს ალექსანდრე ზაგაშვილი.
თუმცა, ჯერ კიდევ არ დაწყებულა მასშტაბური პროექტი, რომლის მშენებლობაც 2019 წელს დაანონსდა სოფელ გერგეტში. როგორც ყაზბეგის მერი აღნიშნავს, თანხის აკუმულირების პროცესი ჯერ კიდევ არ დასრულებულა და პროექტის შესრულებაც არ დაწყებულა.
„გერგეტის პარკისა და გამაჯანსაღებელი კომპლექსის მშენებლობასაც ვგეგმავთ, თუმცა ჯერჯერობით დაფინანსების ნაწილში ველოდებით გარკვეული თანხის აკუმულირებას. დაახლოებით ეს მოითხოვა 8 მილიონი ლარის ინვესტიციას. ველოდებით, რომ ძალიან კარგი შედეგი ექნება ამ პროექტს.
ფაქტობრივად,
წელს საგზაო ინფრასტრუქტურის ძირითად ნაწილს
მოვრჩებით, ისეთ სოფლებში შევდივართ, როგორიც არის ხურთისი, არშა , დარბანი. წყალმომარაგებასთან
დაკავშირებით ვმუშაობთ და უახლოეს პერიოდში ყველა საკითხი მოგვარებული იქნება,“ - ამბობს ყაზბეგის მერი.
ყაზბეგის მუნიციპალიტეტის მიერ გამოცხადებულ კონკურსში კომპანია SPECTRUM-მა გაიმარჯვა. გერგეტის პარკის პროექტის ერთ-ერთ მნიშვნელოვან სივრცედ წარმოდგენილია კულტურის ცენტრის შენობათა ერთობლიობა, რომელიც მრავალფუნქციურია და მოიცავს შემდეგ ობიექტებს:
ეთნოგრაფიულ მუზეუმს;
საგამოფენო სივრცეს;
ხელოვნების სხვადასხვა დარგების შემსწავლელ სივრცეებს;
ლიტერატურულ კაფეს;
საკონფერენციო დარბაზს;
მცირე კვების ობიექტს;
პარკის დაპროექტების პროცესში შენარჩუნდა არსებული მონუმენტი, რომელიც წარმოდგენილია კომპლექსის შენობების ცენტრში.
მარიამ მორგოშია
ყაზბეგი
