EastFruit–ის ქართულმა გუნდმა გაავრცელა ინფორმაცია, რომ საქართველოში ბლის სეზონის დაწყებისთანავე, რომელმაც სტარტი მაისში აიღო, ფერმერები მოსავალთან დაკავშირებით უიმედოდ იყვნენ განწყობილი – გაზაფხულზე არასახარბიელო ამინდის გამო. EastFruit–ის მიერ მაისში ჩატარებულმა ფასების მონიტორინგმა ფერმერების მოლოდინი დაადასტურა: ფასები ჩვეულებრივზე მაღალი აღმოჩნდა.
ამის მიუხედავად, ბლის ექსპორტი საქართველოდან მაისშივე წარმატებით დაიწყო. მაგალითად, უზბეკეთში მოსავალთან დაკავშირებით კიდევ უფრო დიდი პრობლემები იყო, თუმცა ბლის ფასი ადგილზე უკიდურესად მაღალი რჩებოდა. საქართველოს ფინანსთა სამინისტროს ოფიციალური მონაცემებით, მაისში საქართველოდან 9,9 ტ. ბლის ექსპორტი განხორციელდა. თითქოს არც ისე დიდი მოცულობაა, მაგრამ ექსპორტის სასტარტო ეტაპზე ესეც საკმაოდ შთამბეჭდავია, ვინაიდან, ტრადიციულად, ქართული ბალი ექსპორტზე მხოლოდ ივნის–ივლისში გადიოდა.
მიუხედავად იმისა, რომ მაისში ქართული ბლის ძირითადი იმპორტიორი კვლავ რუსეთი იყო, 1,4 ტ. კურკოვანმა ყატარამდეც ჩააღწია, უფრო სწორად, „ჩაფრინდა“. ბაზრის მონაწილეების თქმით, მიუხედავად მრავალი ფაქტორისა, ყატარის ბაზარი საკმაოდ მიმზიდველია ბლის ექსპორტისთვის. კერძოდ, ფასი იმდენად მიმზიდველია, რომ ღირს პროდუქტის თვითმფრინავით ტრანსპორტირება – შესაბამისად მცირე მოცულობებით გაგზავნა, შეფუთვაზე მაღალი მოთხოვნის დაკმაყოფილება და სხვ.
„აგროსტორი“ ერთ–ერთია იმ სამი კომპანიიდან, რომლის წარმოებული ბალიც ყატარში იყიდება – ჰიპერმარკეტების ქსელში LuLu (ლულუ). „აგროსტორი“ ჟოლოს, გარგარს და ბალს აწვდის ტრეიდერს, რომელსაც ხილი შემდეგ ყატარში თვითმფრინავით მიაქვს. ჩამოთვლილი პროდუქტებიდან „აგროსტორი“ მხოლოდ ჟოლოს აწარმოებს, ხოლო გარგარსა და ბალს ადგილობრივი ფერმერებისგან ყიდულობს და პროფესიონალურად ამზადებს ექსპორტზე გასატანად – ახარისხებს და ფუთავს მათ.
მიმდინარე სეზონზე „აგროსტორმა“ ყატარში ექსპორტზე უკვე 3,5 ტ. ბალი გაიტანა. კომპანიის წარმომადგენლის ზურაბ ალავიძის თქმით, ყატარში ხილის ექსპორტისთვის 2020 წელი წარუმატებელი აღმოჩნდა, ავიარეისების გაუქმების გამო. მიმდინარე წელი კი წარმატებით დაიწყო. ალავიძის გათვლებით, მიმდინარე წელს ყატარში ქართული ხილის ექსპორტს რეგულარული ხასიათი ექნება.
„ვფიქრობ, თავდაპირველად კვირაში 2 რეისი საკმაოდ რეალისტურია. ესეც იმ შემთხვევაში, თუ ჩვენ ხილს მხოლოდ „ლულუს“ ჰიპერმარკეტებს მივაწვდით. თუ სხვა პარტნიორების მოძებნასაც შევძლებთ, მაშინ საჰაერო ტრანსპორტით ყოველდღიურად 1,5 ტ. ხილის ექსპორტირებას შევძლებთ“, – აღნიშნა ალავიძემ.
მაისი სეზონის მხოლოდ დასაწყისია. ივნისსა და ივლისში გაცილებით დიდი ოდენობით ბალი გავა საქართველოდან ექსპორტზე. როგორც წესი, ფასების ვარდნის პირობებში სულ უფრო მეტი ტრეიდერი ცდილობს ბლის შესყიდვას. EastFruit–ის მონიტორინგის შედეგების თანახმად, 26 მმ–ზე მეტი დიამეტრის ბლის ფასი ივნისის დასაწყისში საქართველოში მკვეთრად დაეცა – 12 ლარიდან 6 ლარამდე. ივნისის მეორე კვირაში ფასი კიდევ უფრო დავარდა და სულ ოდნავ აღემატება უზბეკური ბლის ფასს.
EastFruit–ის მონაცემებით, საქართველოდან ბლის ექსპორტმა 2020 წელს 6–წლიანი რეკორდი დაამყარა და 504 ტ. შეადგინა. 2019 წელთან შედარებით 2020–ში ეს მაჩვენებელი სამჯერ გაიზარდა. არ არის გამორიცხული, მიმდინარე წელს ამ დარგში კიდევ უფრო დიდი წარმატება ვიხილოთ და ეს თუ ექსპორტის მოცულობაში არ გამოისახება, საექსპორტო არეალის გაფართოება უკვე თვალსაჩინოა.