ყარაბაღის რეგიონი საინვესტიციო ცენტრი ხდება. ინვესტორები რუსეთიდან, თურქეთიდან და სხვა ქვეყნებიდან ყარაბაღის ასათვისებლად დაიძრნენ. ამასთანავე, ისინი მზად არიან სხვადასხვა პროექტებში ჩაერთონ, დაწყებული ენერგეტიკითა და მრეწველობით, დამთავრებული სოფლის მეურნეობის სექტორით. „კომერსანტი“ დაინტერესდა, აფხაზეთის და ცხინვალის კონფლიქტის დარეგულირების შემთხვევაში როგორია საქართველოს ოკუპირებული ტერიტორიების საინვესტიციო პოტენციალი. ყარაბაღის მსგავსად გაიხსნება თუ არა ახალი შესაძლებლობები აფხაზეთისა და ცხინვალის რეგიონებში.
თემაზე შერიგებისა და სამოქალაქო თანასწორობის საკითხებში ყოფილი სახელმწიფო მინისტრი პაატა ზაქარეიშვილი საუბრობს. იგი ამბობს, რომ აფხაზეთში საინვესტიციო პოტენციალი საკმაოდ მაღალია, მაგრამ მისი თქმით, მნიშვნელოვანია, თუ რა ფორმით დარეგულირდება კონფლიქტი. მხოლოდ ამის შემდეგ იქნება შესაძლებელი ოკუპირებული ტერიტორიის განვითარებასა და ეკონომიკურ წინსვლაზე საუბარი.
„კონფლიქტი რომ დარეგულირდება, ფაქტია, მთავარია ვის სასარგებლოდ დარეგულირდება, საქართველოს თუ რუსეთის. აფხაზეთში დიდი საინვესტიციო პოტენციალია, პირველ რიგში ეს არის ტურისტული. მაგრამ, სანამ დასმულ კითხვამდე მივალთ, მანამდე ძალიან ბევრი ნიუანსია გასათვალისწინებელი. მაგალითად, საქართველოს შეუძლია ისე მოაგვაროს კონფლიქტი, რომ არ შეეხოს იმ ფუნდამენტურ, ეროვნულ საკითხებს, რომელიც აფხაზებს აწუხებს. მთავარია, რა ფორმით და როგორ დარეგულირდება კონფლიქტი, საბაზრო ეკონომიკაზე დაფუძნდება თუ გარკვეულ გარიგებაზე? იდეალურ სიტუაციაში აფხაზეთს, როგორც აჭარას, აქვს უნიკალური პოტენციალი, კიდევ უფრო მეტი. იქ შევა ალბათ თურქული და რუსული ბიზნესი. თუ კონფლიქტი მოგვარდება, ჩვენ უნდა გავურიგდეთ რუსებს, ალბათ მათ უნდა დავუკანონოთ ის უკანონო შესყიდვები, რომელიც განხორციელებული აქვთ. ბევრი ფაქტორი იქნება ისეთი, სადაც ანგარიშის გაწევა მოგვიწევს არა აფხაზური მხარისთვის, არამედ რუსეთისთვის. კონფლიქტის მოგვარებაშია ბევრი კომპონენტი ჩადებული. ჩვენ ვუყურებთ როგორ გვარდება კონფლიქტი აზერბაიჯანში - ჯარი შეიყვანეს, დაიკავეს ტერიტორიები, სიტუაციას ისე აგვარებენ, არავის ეკითხებიან. ჩვენ ან ჯარი უნდა შევიყვანოთ, რაც მგონი წარმოუდგენელია, ან უნდა შევიდეთ მოლაპარაკების და გარიგების გზით ცალკე აფხაზურ საზოგადოებასთან და ცალკე რუსულ სახელმწიფოსთან. უამრავი დათქმები იქნება, თუ რა ენაზე იქნება საქმის წარმოება, როგორ მოხდება ინვესტიციების შესვლა, რკინიგზა იმუშავებს თუ არა, საავტომობილო გზები როგორ იმუშავებს. რაც შეეხება სამხრეთ ოსეთის ტერიტორიას, რეგიონს ტურისტული პოტენციალი არ გააჩნია. მადანია მცირე რაოდენობით, რომელსაც უკვე იყენებენ, ამიტომ მეეჭვება, რომ იქ ვინმეს სერიოზული ინვესტიციის განხორციელება უნდოდეს. აქვე უნდა ითქვას ისიც, რომ მე ჯერ ვერ ვხედავ პერსპექტივას, თუ როგორ შეიძლება საქართველომ ეს კონფლიქტი გადაჭრას, რადგან არაფერს აკეთებს. თუ არაფერს აკეთებ, შესაბამისად შედეგსაც ვერ მიიღებ“, — განაცხადა პაატა ზაქარეიშვილმა.
რუსეთ-საქართველოს 2008 წლის აგვისტოს ომის შედეგად მოსკოვმა აფხაზეთისა და ცხინვალის რეგიონის ოკუპაცია განახორციელა. კრემლის შეიარაღებული ძალები დღემდე აკონტროლებენ საქართველოს ამ ტერიტორიებს.