რუსული კომპანია Yandex Go საქართველოში სატვირთო გადაზიდვების ბაზარზეც შევიდა. როგორც „კომერსანტს“ კომპანიის სათავო ოფისიდან აცნობეს, სატვირთო მანქანის გამოძახებასთან ერთად, აპლიკაციით შესაძლებელია მტვირთავის მომსახურების შეკვეთაც და გადაზიდვის ტარიფი თბილისში 35 ლარიდან იწყება.
„გასულ კვირას ავამოქმედეთ ტვირთის გადაზიდვის სერვისი - თბილისში Yandex Go-ს აპლიკაციაში ახლა შესაძლებელია სატვირთო მანქანის გამოძახება. თუ მომხმარებელი აპირებს საცხოვრებლად სხვაგან გადასვლას, მაღაზიიდან ახალი დივანის ან რემონტისთვის სამშენებლო მასალების წამოღებას. დიდი ზომის ნივთებისთვის სატვირთო მანქანის შეკვეთა ისეთივე იოლია, როგორც ჩვეულებრივი მანქანის შეკვეთა. მგზავრობაზე თვალის დევნება კი შესაძლებელია პირდაპირ აპლიკაციაში.
თბილისში გადაზიდვის ღირებულება ახალი ტარიფით 35 ლარიდან იწყება. ღირებულებაში შედის ჩატვირთვის 10 წუთი და გადმოტვირთვის 10 წუთი, ასევე 15 კილომეტრი გზა და დრო გზაში შეზღუდვების გარეშე. მაგალითად, ასეთი ღირებულება ექნება ტვირთვის გადაზიდვას ელიავას ბაზრობიდან შალვა ნუცუბიძის ქ., 207-მდე. მგზავრობის ღირებულება ცნობილია წინასწარ – საკმარისია შეიყვანოს მომხმარებელმა აპლიკაციაში დანიშნულების წერტილის მისამართი. ნივთების ჩატვირთვა-გადმოტვირთვის დამატებითი დროის ღირებულება გაანგარიშდება წუთობრივად და არა საათობრივად და შეადგენს 0,35 ლარს/წუთში. ამიტომ მომხმარებლები იხდიან მხოლოდ იმ დროის ღირებულებას, რა დროსაც იკავებს ტვირთის მიტანა.
სატვირთო მანქანასთან ერთად შესაძლებელია ერთი მტვირთავის გამოძახება, რომელიც მათ დაეხმარება სიმძიმეების გადატანაში და ითვალისწინებს დამატებით გადასახადს. ერთადერთი შეზღუდვა ის არის, რომ თითოეული საგნის წონა არ უნდა აღემატებოდეს 20 კგ-ს.
„სატვირთო“ ტარიფით შეკვეთაზე მოდის დიდი ტევადობის მანქანები. მაგალითად, Ford Transit, Mercedes-Benz Sprinter. სატვირთო მანქანაში შესაძლებელია მოთავსდეს ბევრი ყუთი ნივთებით, საშუალო ზომის დივანი, ველოსიპედი და სამზარეულო ქურა.
Yandex Go-ში ასევე ხელმისაწვდომია მომსახურება „მიტანა“, რომლის საშუალებითაც შესაძლებელია მცირე ზომის ნივთების და დოკუმენტების მიწოდება ქალაქის ფარგლებში“, - განმარტავენ Yandex Go-ს წარმომადგენლები.
ასევე გასულ კვირას ბელარუსის დედაქალაქ მინსკში ამოქმედდა Yandex.Eats, რაც გულისხმობს საკვების ადგილზე მიტანას. „კომერსანტი“ დაინტერესდა, აპირებს თუ არა კომპანია საქართველოშიც საკვების მიტანის სერვისის ამოქმედებას, რაზეც Yandex-ში გვიპასუხეს, რომ განიხილება სხვა ქვეყნებიც და როგორც კი იქნება ამასთან დაკავშირებით გადაწყვეტილება მიღებული, ინფორმაციაც გავრცელდება.
„საქართველოში უკვე ფუნქციონირებს რამდენიმე სერვისი. მაგალითად, Yandex Go პროგრამაში შეგიძლიათ არა მხოლოდ სწრაფად შეუკვეთოთ მანქანა, არამედ გაგზავნოთ საგნები ან სამუშაო დოკუმენტები მიწოდების სერვისის გამოყენებით, ასევე ნახოთ საზოგადოებრივი ტრანსპორტის განრიგი.
გასულ კვირას Yandex.Eats სერვისი მართლაც ამოქმედდა მინსკში. რა თქმა უნდა, ჩვენ სხვა ქვეყნებიც გვაინტერესებს. როდესაც მზად ვიქნებით ამ სერვისის საქართველოში გასაშვებად - აუცილებლად გეტყვით“, - აღნიშნავენ კომპანიაში.
„კომერსანტი“ ავეჯის გადაზიდვის კომპანიას 256060–ს დაუკავშირდა, კომპანიის დირექტორი ლუკა ხიზანიშვილი აღნიშნავს, რომ Yandex-ი ამ ეტპზე შედარებით ძვირი სერვისითაა წარმოდგენილი და ამ ეტაპზე მათგან კონკურენციას არ „უშინდებიან“.
„ყველა, ვინც ბაზარზე შემოდის, რა თქმა უნდა, კონკურენტია. Yandex-იდან ჩვენც დაგვიკავშირდნენ და თანამშრომლობა გვთხოვეს, მაგრამ, ბუნებრივია, არ ვართ მათთან საქმიანობაში ჩართვით დაინტერესებული ამ ეტაპზე.
ისეთი ტარიფები
აქვთ, არ ვიცი, რამდენად მოიკიდებენ ფეხს, საბაზროსთან შედარებით ძალიან ძვირია.
ჩვენ რაც შეგვეხება,
25 წელია ვმუშაობთ ამ სფეროში, პირველი კომპანია ვართ საქართველოში და ჯერჯერობით თავდაჯერებულები
ვართ. ჯერ კიდევ გვენდობა მომხმარებელი და
წლებია მათ იმედებს ვამართლებთ“, - ამბობს ლუკა ხიზანიშვილი.
საქართველოში Yandex Go-ში გაერთიანებულია რამდენიმე სერვისის შესაძლებლობები: მანქანის შეკვეთა, ნივთების გაგზავნა, ტვირთების ტრანსპორტირება და საზოგადოებრივი ტრანსპორტის განრიგი.
მარიამ მორგოშია