შვეიცარიის ფედერალურ პოლიციას ახალი პრობლემა გაუჩნდა - დანაშაულებრივი ქსელი, რომელიც ყალბი კოვიდ-პასპორტებით ვაჭრობს.
სამართალდამცავების აზრით, ბევრ ადამიანს უცხოეთში წასვლა ან მასობრივ ღონისძიებებზე დასწრება სურს, თუმცა არ შეუძლია იმის გამო, რომ ჯერჯერობით აცრილი არაა - სწორედ ეს არის თაღლითების საქმიანობის მთავარი წამახალისებელი პირობა.
ეს პრობლემა განსაკუთრებით მწვავე 1 ივლისის შემდეგ გახდა, როდესაც ძალაში ერთიანი ევროპული კოვიდ-პასპორტები შემოვიდა. მათი მფლობელებისთვის გახსნილია თავისუფალი გადაადგილება ევროკავშირის 27 ქვეყანაში.
ზოგიერთმა ქვეყანამ - გერმანიამ, ბულგარეთმა, ხორვატიამ, ჩეხეთმა, დანიამ, საბერძნეთმა და პოლონეთმა - ეს ინიციატივა ჯერ კიდევ 1 ივნისიდან აამოქმედეს. მათი მიზანია ტურისტული ბიზნესის გადარჩენა და ამ ტიპის პასპორტი გაეცემა მხოლოდ იმათ, ვინც ევროპის მიერ აღიარებული ვაქცინის 2 დოზა გაიკეთა - ესაა Pfizer, Moderna, Janssen და AstraZeneca-ს პრეპარატები.
შეღავათი არ გავრცელდება ინდურ, ჩინურ, რუსულ ან კუბურ ვაქცინებზე.
ან ეტაპზე გამოძიება დანაშაულებრივი ჯგუფის წინააღმდეგ ჯერ არ დაწყებულა, მაგრამ პარალელურად ვაქცინაციის ყალბი სერტიფიკატები უკვე ბრუნვაშია, განსაკუთრებით იმ ქვეყნებში, სადაც მოსახლეობას მნიშვნელოვანი ნაწილი ვაქცინებს არ ენდობა - მაგალითად, გერმანიაში, სადაც მოსახლეობის 40%-ს აცრა არ სურს.
საფრთხე ასევე ევროკავშირის არაწევრი ქვეყნებისგანაც მომდინარეობს - განსაკუთრებით რუსეთისგან, სადაც ბევრ მოქალაქეს ევროპაში ჩასვლა სურს, მაგრამ ეროვნულ ვაქცინას „სპუტნიკ 5“-ს არ ენდობა და უპირატესობას ყალბ სერტიფიკატს ანიჭებს.
ამ დროს კი მოსკოვში და სანქტ-პეტერბურგში პანდემიის ახალი ტალღა ფიქსირდება, თანაც ამ შემთხვევაში კორონავირუსის უფრო გადამდები შტამი „დელტა“ დომინირებს. დღეს მოსკოვში ყალბი სერტიფიკატის შეძენა 200 დოლარადაა შესაძლებელი და თაღლითები მსურველთა სიმცირეს არ უჩივიან.
არალეგალური კოვიდ-პასპორტებით ვაჭრობა სრულიად ახალი მოვლენაა, თუმცა, მას წინ ყალბი პსრ-ტესტების ცნობების გაყიდვა უძღოდა. ამ კუთხით შავი ბაზარი ევროპაში ჯერ კიდევ თებერვალში გაჩნდა - ათასობით ტურისტმა ყალბი ცნობებით სამხრეთ ევროპის კურორტები მოიარა, და არავინ იცის, მათ შორის დაინფიცირებული რამდენი იყო.
არსად გამქრალა ვაქცინებით უკანონო ვაჭრობა - მხოლოდ ინდოეთის ქალაქ მუმბაიში თაღლითების მსხვერპლი 2000-ზე მეტი ადამიანი გახდა. პოლიციის მონაცემებით ვაქცინის ნაცვლად მათ ფიზიოლოგიური ხსნარი მიჰყიდეს, რის გამოც დაკავებულია 9 ადამიანი, მათ შორის ერთ-ერთი კერძო კლინიკის 2 ექიმი.
ამერიკულმა ფარმაცევტულმა გიგანტმა Pfizer-მა კი აპრილის ბოლოს დაადასტურა, რომ მისი ბრენდის ქვეშ ვაქცინების ნაცვლად გაურკვეველი სითხე მექსიკაში და პოლონეთშიც იყიდებოდა.
letemps.ch
მოამზადა თენგიზ აბლოთიამ