3 თვის შემდეგ საქალაქთაშორისო მიმოსვლა აღდგა, თუმცა მგზავრობა გაძვირდა. ტარიფი დაახლოებით 2-დან 5 ლარამდეა გაზრდილი. შეზღუდვების მოხსნის მიუხედავად მგზავრების საქალაქთაშორისო გადაადგილებას არ ახორციელებს „მეტრო ჯორჯია“. კომპანიაში „კომერსანტს“ განუცხადეს, რომ რეგულაციების შემსუბუქების მეორე დღეს მუშაობის განახლება მათთვის შეუძლებელია. „მეტრო ჯორჯია“ ადასტურებენ იმას, რომ მგზავრობის ტარიფი გაიზრდება, თუმცა კონკრეტული თანხის დასახელება ამ ეტაპზე არ შეუძლიათ. კომპანიაში ახლა იმ ეტაპებს გადიან, რომელიც კომპანიას მუშაობის განახლებისთვის სჭირდება.

„ხვალ ვიხსნებით და დავიწყებთ მუშაობას, ასე არაა. ამდენი ხნის შემდეგ რთულია თანამშრომლების მობილიზაცია - უკან დაბრუნდება, ყველაფერი თავიდანაა გადასახედი. ტრანსპორტი არის მწყობრში მაგრამ პირველივე დღეს მუშაობის დაწყება მარტივი არაა. ბევრი რაღაც უნდა გადამოწმდეს. ტექნიკური მხარეებიც მოსაგვარებელია, ბილეთების ონლაინ გაყიდვები გაქვს, სისტემაა ჩასართავი. არის რიგი ეტაპები, რომელიც კომპანიამ უნდა გაიაროს იმისთვის, რომ განახლდეს მოძრაობა. დამფუძნებლებთან ერთად უნდა გავიაროთ რიგი საკითხები, მათ შორის საფასო პოლიტიკა. ყველაფერი გაძვირდა მათ შორის საწვავი, ეს ყველფერი ფასზე რა თქმა უნდა იმოქმედებს“, - აცხადებს ლაშა კენჭაძე.